Skip to main content

Posts

Showing posts from 2022

அட்டைப் படங்கள் சிறு குறிப்பு

 அட்டைப் படங்கள் சிறு குறிப்பு இரண்டாம் பதிப்பின் அட்டைப் படங்களை குறித்து சில விஷயங்கள். பிரபந்தத்தை கையில் ஏந்தினால் சில நொடிகளாவது அட்டைப் படத்தை தரிசிக்க வேண்டும் என்று விருப்பப்பட்டேன். அதனால் அட்டைப் படத்தின் நடுவில் இருக்கும் பெருமாள் படத்தை மட்டும் ’UV’ முறையில் அச்சடிக்கப்பட்டது. முதல் பதிப்பில் நம்பெருமாள் மிக அழகாக காட்சி கொடுத்தார். பலர் “அட்டைப் படத்தை பார்த்துக்கொண்டே இருக்கலாம்” என்று கூறிய போது மகிழ்ச்சியாக இருந்தது. இரண்டாம் பதிப்பு இரண்டு புத்தகங்களாக வெளியிட வேண்டும் என்று முடிவு செய்த போது என்ன அட்டைப் படம் வைக்கலாம் என்று யோசித்த போது நம்பெருமாள் தாயார் படம் தேடாமலே கிடைத்தது. பாகம்-1, பாகம்-2 இரண்டும் கையில் இருந்தால் ‘சேர்த்தி சேவை!” அநுபந்தம் அட்டைப் படம் என்ன என்று யோசிக்கும் போது மீண்டும் நம்மாழ்வார் மோட்சம் படம் கிடைத்தது. இதையும் தேடவில்லை. மூன்று அட்டைப் படங்களும் எடுத்தவர் என் நண்பர் திரு சுதாகர் அவர்கள். அவருக்கு என் நன்றிகள். மூன்று புத்தகங்களுக்கும் உட்புற அட்டையில் என்ன படங்கள் வைக்கலாம் என்று யோசித்த போது கோவிட் போது பங்குனி உத்திரம் நடைபெறவில்லை

’பயிலும் சுடர் ஒளி’ - உள்ளர்த்தம்

 ’பயிலும் சுடர் ஒளி’ - உள்ளர்த்தம் அடியார் ஒருவர் சிறிது நேரத்துக்கு முன் கூப்பிட்டார். “சாமி எனக்கு புத்தகம் இன்னும் வரவில்லை. எப்போது வரும்?” ”அடுத்த வாரம் அனுப்புவோம் அதற்கும் அடுத்த வாரம் உங்கள் கைக்கு கிடைக்கும்” என்றேன். “சரிங்க” என்று சொன்னவர் “எங்கள் ஊரில் இருப்பவர்களுக்கு மொத்தமாக அனுப்பிவிடுங்கள். நான் என் டூவீலரில் கொண்டு போய் கொடுக்கிறேன்” என்றார் “உங்களுக்கு கஷ்டமாக இருக்குமே?” என்றேன். அதற்கு அவர் “சாமி இதில என்ன கஷ்டம். இதனால் பல அடியார்களை தரிசிக்கும் பாக்கியம் அடியேனுக்கு கிடைக்கும்” என்றார் நம்மாழ்வாரின் பயிலும் சுடர் ஒளி மூர்த்தியை,* பங்கயக் கண்ணனை* பயில இனிய* நம் பாற்கடல்-சேர்ந்த பரமனை** பயிலும் திரு உடையார்* எவரேலும், அவர் கண்டீர்* பயிலும் பிறப்பிடைதோறு* எம்மை ஆளும் பரமரே என்ற பாசுரத்தின் உள்ளர்த்தம் நமக்காகத் திருப்பாற் கடலில் துயில் கொண்டிருக்கும் எம்பிரானை வணங்கும் அடியார்கள் who ever they may be, they are my masters, through seven lives என்கிறார் நம்மாழ்வார் - சுஜாதா தேசிகன் 28.05.2022

ஸ்ரீ உ.வே எம்.எஸ். வேங்கடாச்சாரியார் பாராட்டுரை

 ஸ்ரீ உ.வே எம்.எஸ். வேங்கடாச்சாரி பாராட்டுரை முதல் பதிப்பு வெளி வந்த சமயம், அதன் பிரதியை ஸ்ரீமந் நாதமுனிகள் சந்நிதியில் ஆசீர்வாதம் பெற சென்றிருந்தேன். அங்கே என்ன நடந்தது என்று சுருக்கமாக சொல்லுகிறேன். அன்று காலை ஒன்பது மணிக்கு காட்டுமன்னார் கோயிலில் வீரநாராயணப் பெருமாள் முன் நின்றேன். இங்கே தான் சுமார் 1200 வருடங்கள் முன் நாதமுனிகள் நாலாயிரத்தையும் அரங்கேற்றம் செய்தார் என்ற நினைப்பே உள்ளத்தில் ஆனந்தத்தை கொடுத்தது. காட்டுமன்னார் பெருமாள் திருவடிகளில் பிரபந்தப் புத்தகத்தை வைத்து அர்ச்சகர் “இவர் காட்டும் மன்னார். நாலாயிரத்தை நாதமுனிகளுக்குக் காட்டிக்கொடுத்த மன்னார். நாதமுனிகள் தினமும் ஆராதனை செய்த பெருமாள்…” என்று கூறி மன்னார் ஆசிர்வதிக்க அர்ச்சகரிடம் “நாதமுனிகள் திருவடிகளிலும் வைத்து ஆசீர்வாதம் வேண்டும்” என்றேன். “பெருமாள் திருவாராதனம், பிறகு கோஷ்டி முடிந்த பின் தான். நாழியாகும்” என்றார். அங்கே இருந்த தீர்த்தம் ஸ்தானிகர் ( ஸ்ரீநிவாசாச்சார் ஸ்வாமி ) “உங்களுக்கு பெங்களூர் செல்லுவதற்கு நேரம் ஆகிவிட்டது என்றால் நாதமுனிகளின் சந்நிதி வாசல் படியில் வைத்துச் சேவித்துவிட்டுச் செல்லுங்கள்” என்றார

ஸ்ரீ உ.வே.அரங்கராஜன் அவர்கள் அணிந்துரை

ஸ்ரீ உ.வே.அரங்கராஜன் அவர்கள் அணிந்துரை முதல் பதிப்பு பிரபந்தம் வந்த பிறகு ஒரு நாள் மதுரை பேராசிரியர் முனைவர் ஸ்ரீ உ.வே அரங்கராஜன் ஸ்வாமி என்னை தொலைப்பேசியில் அழைத்தார். “பிரபந்தம் பதிப்பாசிரியர் என்ற முறையில் நீங்கள் சிலவற்றை தெரிந்துகொள்ள வேண்டும்” என்று ஆழ்வார் பாசுரத்திலிருந்து சில வரிகளை மேற்கோள் காண்பித்து, அதற்கு விளக்கம் கொடுத்தார். 87 வயதை தாண்டியவர் என்னை கூப்பிட வேண்டும் என்று அவசியம் இல்லை. அளவு கடந்த பிரேமையும், ஆழ்வார்களின் மீதும், அவர்களின் ஈரத் தமிழின்பால் பிரேமையினால் மட்டுமே அது நடந்தது.   இன்றும் பிரபந்தத்தில் ஏதாவது சந்தேகம் வந்தால் உடனே அவரை அழைத்துவிடுவேன். உடனே வகுப்பு ஆசிரியர் போல அழகாக சொல்லிக்கொடுப்பார்.   இரண்டாம் பதிப்பு பிரிண்டுக்கு போகும் சமயம் அவரிடம் தண்டம் சமர்ப்பித்து ”அடியேனுக்கு உங்கள் கையினால் ஓர் அணிந்துரை வேண்டும்” என்று கேட்டுக்கொண்டேன். “பார்க்கிறேன்” என்று கூறியவர் சில நாட்களில் என்னை அழைத்து அவர் எழுதிய அணிந்துரையை எனக்கு நிறுத்தி நிதானமாக படித்து காண்பித்து அனுப்பிவைத்தார். இந்த பெரும் பெறு எனக்கு பூர்வ ஜென்ம புண்ணியம். - சுஜாதா தேசிகன் 22.05.

முக்கியமான அறிவிப்பு - மோசடி வேலை

 முக்கியமான அறிவிப்பு  இன்று ஒருவர் “உங்களுக்கு பணம் அனுப்பிவிட்டேன். புத்தகம் எனக்கு இன்னும் கிடைக்கவில்லை, போன புதன் கிழமையே அனுப்பிவிடுவீர்கள் என்று கூறினீர்களே” என்றார்.  எனக்கு சந்தேகம் வந்து அவரிடம் பேசிய போது 9789804936 மொபைல் நம்பரிலிருந்து ஒரு நபர் ( கணேஷ் வரதன் ) என்று கூறியிருக்கிறார்.  அவர் இந்த 9884214060 எண்ணுக்கு GPay அனுப்ப சொல்லியிருக்கிறார்.  பணத்தை அனுப்பிய பிறகு.   இந்த இரண்டு நம்பரையும் தொடர்பு கொள்ள முடியவில்லை.  இது ஒரு மோசடி வேலை. தயவு செய்து Ramanuja Desika Munigal Trustக்கு மட்டும் பணம் அனுப்புங்கள். வேறு யாருக்கும் அனுப்பாதீர்கள்.  இந்த இரண்டு போன் நம்பரிலும் எந்த பதிலும் இல்லை. இந்த இரண்டு நம்பரும் facebookல் தேடிய Hema Malini என்ற நபருக்கு செல்லுகிறது.  cyber crime க்கு புகார் கொடுக்க இருக்கிறேன். முகநூலில் காவல் துறை நண்பர்கள் இருந்தால் உதவலாம்.  நன்றி - சுஜாதா தேசிகன் 22.05.2022

ஆசாரியரின் ‘அநுக்ரஹ’ ஸ்ரீமுகம்

ஆசாரியரின் ‘அநுக்ரஹ’ ஸ்ரீமுகம் சென்ற மாதம் அடியேனின் ஆசாரியனான ஸ்ரீ அஹோபில மடம் 46ஆம் பட்டம் ஸ்ரீமதழகியசிங்கர்  பெங்களூர் விஜயத்தின் போது அவரைச் சேவித்து ஆசீர்வாதம் பெற்றேன்.  கிளம்பும் முன் மீண்டும் அவரைச் சேவித்து “இன்னும் இரண்டு வாரத்தில் பிரபந்தம் புத்தகம் இரண்டாம் பதிப்பு வருகிறது.  உங்கள் ஆசிரிவாதம் வேண்டும்” என்றேன்.  “நன்றாக வரும். இது போல மேன்மேலும் செய்யுங்கள்” என்று ஆசிவர்வாதம் செய்தார். அப்போது கையில் இருந்த முதல் பதிப்பை அவரிடம் சமர்பித்தேன்.  “இந்தப் புத்தகம் நினைவு இருக்கிறது” என்று இரண்டாம் பதிப்பின் விவரங்களை கேட்டறிந்தார்.  வீட்டுக்கு திரும்ப, காரை ஸ்டார்ட் செய்யும் போது ஓர் எண்ணம் தோன்றியது.  ஆசாரியன் இருக்கும் அறைக் கதவை தட்டி உள்ளே சென்று அவரிடம் “இரண்டாம் பதிப்புக்கு ஸ்ரீமுகம் அருளவேண்டும்” என்றேன்.  “மெலிதான புன்னகையுடன். ஸ்ரீ காரியம் ஊரில் இல்லை. வந்தவுடன் ஏற்பாடு செய்கிறேன்” என்று அருளினார்.  வாகனத்துக்கு வந்த போது புத்தகம் அச்சுக்கு செல்லும் நாள் நினைவுக்கு வந்தது.   மீண்டும் கதவை தட்டிக்கொண்டு உள்ளே சென்றேன்.  “புத்தகம் ஒரு வாரத்தில் அச்சுக்கு செல்கிறது....அத

இரண்டாம் பதிப்பு - பதம் பிரித்த பிரபந்தம் அப்டேட் - 17.05.2022

பதம் பிரித்த பிரபந்தம் அப்டேட் - 17.05.2022 பணம் அனுப்பிவிட்டேன், எனக்கு எப்போது Tracking Number  வரும் ?  பத்து நிமிடம் முன் பணம் அனுப்பியவர்களுக்கு கூட Tracking Number அனுப்பிவிட்டோம்.  இனி பணம் அனுப்புகிறவர்களுக்கு டிராக்கிங் நம்பர் அன்றே அனுப்பப்படும்.  எனக்கு டிராக்கிங் நம்பர் வரவில்லையே ?  கீழே கமெண்ட் அல்லது rdmctrust@gmail.com க்கு ஒரு மெயில் அனுப்பவும்.  சரி, ஏன் இந்த தாமதம் ?  புத்தகம் அறிவிப்பு வந்தவுடன் பலர் புக் செய்ததால் எல்லாவற்றையும் வங்கி கணக்கில் சரி பார்த்து, டிராக்கிங் நம்பர் அனுப்ப தாமதம் ஆகிவிட்டது.  எவ்வளவு புத்தகங்கள் அச்சடிக்க திட்டம் ?  ஆயிரம்  புத்தகங்கள் அச்சடிக்க திட்டமிட்டிருந்தோம். ஆனால் அறிவித்த சில நாட்களில் பலர் புக் செய்த்தால்,  கூடுதலாக  புத்தகம் அடிக்க வேண்டும் என்று தோன்றியது.  தற்போது 1500 புத்தகங்கள் அச்சடிக்கிறோம்.  இரண்டு மாதம் கழித்து புத்தகம் கிடைக்குமா ?  புத்தகம் இருந்தால் நிச்சயம் கிடைக்கும். இல்லை என்றால் அடுத்த பதிப்புக்கு காத்திருக்க வேண்டும்.  சரி, பணம் அனுப்பிவிட்டேன், டிராக்கிங் நம்பர் கிடைத்துவிட்டது, புத்தகம் எப்போது கைக்கு வரும் 

’அடியேன் சாமிக்கு’ மூன்று செட் பார்சல்

 ’அடியேன் சாமிக்கு’  மூன்று செட் பார்சல் கடந்த சில மாதங்களாக பிரபந்தம் புத்தகம் குறித்துப் பல அழைப்புகள் வரும். மார்ச் முதல் வாரம் என்று நினைக்கிறேன் ஒரு தொலைப்பேசி அழைப்பு வந்தது. பேசியவர் ’அடியேன் சாமி’ என்று ஆரம்பித்தவுடன் அந்த அடியேனில் உண்மையான ‘அடியேன்’ ஒளிந்துகொண்டு இருந்தது. பேச்சு வட்டாரமொழியில் தமிழ்நாட்டில் ஏதோ ஒரு கிராமபுரத்தை நினைவுபடுத்தியது.  குரல் நாற்பது என்றது.  “சாமி பிரபந்தம் புத்தகம் எங்கே கிடைக்கும் அடியேனுக்கு ஒரு பிரதி வேண்டும்” என்று சுத்தமான தமிழில் இருந்தது.  ”புத்தகம் தயாராகிக்கொண்டு இருக்கிறது. இன்னும் ஒரு மாதம் ஆகும்” என்றேன்.  “அப்ப ஒரு மாதம் கழித்து மீண்டும் கூப்பிடட்டுமா ?” “சரி, ஏப்ரல் முதல் வாரம் கால் செய்யுங்க” சரியாக ஏப்ரல் முதல் வாரம் அவர் மீண்டும் அழைத்தார் மீண்டும் அதே “அடியேன் சாமி!” என்று ஆரம்பித்தார்.  “நீங்க ஏப்ரல் முதல் வாரம் அழைக்க சொல்லியிருந்தீங்க…மன்னிக்கனும்” என்று மீண்டும் பிரபந்தம் புத்தகத்தை பற்றிக் கேட்டார்.  ”புத்தகம் ரெடியாகிக்கொண்டு இருக்கிறது…உடையவர் திருநட்சத்திரம் 5-மே அன்று வெளியிட முடிவு செய்திருக்கி்றோம்… அப்ப கால் செய்யுங்

செய்ந்நன்றி

செய்ந்நன்றி திருக்குறளில் செய்ந்நன்றியறிதல் என்று ஓர் அதிகாரமே இருக்கிறது. பொதுவாக நாம் பிறருக்குச் செய்த நன்றி தான் நினைவில் இருக்கும். ஆனால் பிறர் நமக்கு செய்த நன்றி மறந்துவிடுவோம்.  கைமாறு கருதாது செய்த ‘செய்ந்நன்றியை’ போற்ற வேண்டாம், மறக்காமல் இருக்கலாம். மறப்பதற்கு முன் அதை இங்கே எழுதிவிடுவது என்ற முடிவு. .  ஆழ்வார்கள் திருவாய் மலர்ந்து அருளிய நாலாயிர திவ்யப் பிரபந்தம் இரண்டாம் பதிப்பிற்குப் பலர் உதவியிருக்கிறார்கள்.  புத்தகம் அச்சுக்குச் செல்லும் சமயம், அடியேனின் ஆசாரியனான 46ஆம் பட்டம் ஸ்ரீமதழகிய சிங்கரை சேவித்து, பிரபந்தம் இரண்டாம் பதிப்பு வருகிறது, அதற்கு உங்கள் ஆசீர்வாதம் வேண்டும் என்றேன். “நல்லா வரும்!” அன்று திருவாய் மலர்ந்தார். சட்டென்று அவரிடம் ”ஸ்ரீமுகம் அருள முடியுமா ?” என்று கேட்க  “ஸ்ரீகாரியம் ஊரில் இல்லை, வந்தவுடன் தருகிறேன்” என்றார்.  “புத்தகம் சில நாளில் அச்சுக்கு போகிறது… “ என்றேன்.  உடனே ஸ்ரீமுகத்துக்கு ஏற்பாடு செய்து அவர் கையால் அக்ஷதையுடன் ஆசீர்வதித்தார்.   தன் 90 வயதிலும் சிரமம் பாராமல், திரு பி.எஸ்.ஆர் என்ற ‘கடுகு’ ஆசாரியன் திருவடி அடைவதற்கு ஒரு நாள் முன் இந்த

ஸ்ரீ கமலவல்லி நாச்சியார் ஆசீர்வாதம்

ஸ்ரீ கமலவல்லி நாச்சியார் ஆசீர்வாதம் அடியேனுக்கு மிக உகந்த திவ்ய தேசம் உறையூர் கமலவல்லி நாச்சியார். சற்று முன் பிரபந்தப் புத்தகத்தை நாச்சியார் ஆசிர்வதிக்க அதை ஸ்ரீராமானுஜர் பெற்றுக்கொண்டார்.  என் ஆசையை நிறைவேற்றிக் கொடுத்த என் ஆப்த நண்பர் Kesavan Srinivasan அவர்களுக்கு தலையல்லால் கைமாறிலேன்  படத்தில் ஸ்ரீ உ.வே ஸ்ரீவத்ஸன் (பராசர பட்டர்) ஸ்வாமிகள்.  - சுஜாதா தேசிகன் 5.5.2022

உடையவருக்குப் பிறந்த நாள் பரிசு !

 உடையவருக்குப் பிறந்த நாள் பரிசு !  போன வருடம் ஸ்ரீ உடையவர் திருநட்சத்திரம் அன்று ஆழ்வார்கள் அருளிய நாலாயிரத் திவ்யப் பிரபந்தம் புத்தகம் வெளியிட்டு பலர் அதைப் பெற்றுக்கொண்டு ஒரே மாதத்தில் அது தீர்ந்தது.   இந்த வருடமும் ஸ்ரீ உடையவர் திருநட்சத்திரமான இன்று இரண்டாம் பதிப்பு வெளியிடப்பட்டதை மகிழ்ச்சியுடன் தெரிவித்துக்கொள்கிறேன்.  ஸ்ரீபெரும்புதூர் ஸ்ரீ ஆதிகேசவப் பெருமாள் ஆசியுடன், ஸ்ரீராமானுஜர் சந்நிதியில் இன்று காலை என் தம்பி உடையவர் சந்நிதியில் புத்தகத்தை சமர்பிக்க, அர்ச்சகர் ”இன்று முழுக்க இந்தப் புத்தகம் உடையவரிடமே இருக்கட்டும்” என்று தானுகந்த திருமேனி அருகில் உடையவர் உகந்த பிரபந்தத்தை எழுந்தருளச் செய்துவிட்டார். ஆயிரம் ஆண்டுகளில் உடையவருக்கு பிறந்த நாள் பரிசாக பிரபந்தப் புத்தகம் கிடைப்பது இதுவே முதல் முறை என்று நினைக்கிறேன்!  - சுஜாதா தேசிகன் 5.5.2022  படம்1 : ஸ்ரீபெரும்புதூரில் எம்பெருமானார் உகந்து அளித்த துளசி பிரசாதத்துடன் புத்தகம் படம்2: யதிராஜர் ஆசீர்வதிக்க எங்கள் அகத்தில் ஆழ்வார்கள் அருளிச் செயல்காளுடன்.   பிகு: நேற்று முன் தினம் அறிவிப்பு வெளியானது முதல் பலர் ஆர்வத்துடன் புத்தகத

பதம் பிரித்த பிரபந்தம் - இரண்டாம் பதிப்பு - அறிவிப்பு

பதம் பிரித்த பிரபந்தம் - இரண்டாம் பதிப்பு - அறிவிப்பு  ஸ்ரீ ஸ்ரீமதே ராமானுஜாய நம:  சென்ற வருடம் ‘பதம் பிரித்த பிரபந்தம்’ புத்தகம் குறித்து எழுதியதும் அதைத் தொடர்ந்து நடந்த நிகழ்வுகளும் உங்களுக்கு நினைவு இருக்கலாம்.  முதல் பதிப்பு சென்ற ஆண்டு 2021 ஸ்ரீராமானுஜர் திருநட்சத்திரம் அன்று வெளியிடப்பட்டு, ஒரே மாதத்தில் தீர்ந்து அடுத்த பதிப்பு எப்போது வரும் என்று பலர் கேட்டுக்கொண்டே இருந்தார்கள்.  இரண்டாம் பதிப்பை உடனே கொண்டு வந்திருக்கலாம். ஆனால் அவசரப்படாமல், முதல் பதிப்பை உபயோகித்தவர்கள் சொன்ன கருத்துக்களை நினைவில் கொண்டு, புத்தகத்தை மேலும் செம்மைப்படுத்தி இரண்டாம் பதிப்பு இந்த ஆண்டு ஸ்ரீராமானுஜர் திருநட்சத்திரம் அன்று (5.5.2022) வெளிவர இருக்கிறது. புத்தகம் பற்றிய விபரம் மற்றும் அடிக்கடி கேட்கப்படும் கேள்விகளைக் கீழே தந்துள்ளேன்.  முதல் பதிப்பிற்கும் இரண்டாம் பதிப்பிற்கும் என்ன வித்தியாசம் ?  இந்தப் பதிப்பிற்கு அடியேனின் ஆசாரியனான 46ஆம் பட்டம் ஸ்ரீமதழகிய சிங்கர் ஸ்ரீமுகம் சாதித்துள்ளார்.  மதுரைப் பேராசிரியர் ஸ்ரீ உ.வே அரங்கராஜன் அவர்கள் அணிந்துரையும், ஸ்ரீ.உ.வே வேங்கடாசாரி அவர்கள் பாராட்ட

அநுபந்தம் - அறிமுகம்

அநுபந்தம் - அறிமுகம் ஆழ்வார்கள் திருவாய் மலர்ந்து அருளிய நாலாயிர திவ்யப் பிரபந்தப் புத்தகத்தைத் தொகுக்கும் சமயம், ஒப்புநோக்கப் பலர் பதிப்பித்த புத்தகங்களை ஆராயும் வாய்ப்புக் கிடைத்தது. பழைய பதிப்பில் மறைந்திருந்த தகவல்கள் கண்டு வியந்தேன். கணினி இல்லாத அக்காலத்தில், கணினிக்கு நிகரான அறிவைக் கொண்டு அவர்கள் தொகுத்த விஷயங்கள் பிரமிப்பூட்டியது. துரதிர்ஷ்டவசமாக  பிற்கால வெளியீடுகளில், இந்தப் பொக்கிஷங்களைத்  தொலைத்துவிட்டோம். சில உதாரணங்களைத் தருகிறேன்.  1943ஆம் ஆண்டு ’மயிலை மாதவ தாசன்’ பதிப்பித்த புத்தகத்தில் பல குறிப்புகள் இருக்கிறது. உதாரணமாக ஆழ்வார் பாசுரங்களில்  எங்கு எல்லாம் வண்டுகள், கிளி, குயில் போன்றவற்றை வழிபட்டுள்ளார்கள்; ஆழ்வார்களைக் குறித்த கல்வெட்டுக்கள் போன்றவை ஒளிந்துக்கொண்டு இருந்தன. இது போன்ற விஷயங்களை தேடி எடுத்து தந்துள்ளோம்.  1956, எஸ்.ராஜம் அவர்கள் பதிப்பித்த திவ்யப் பிரபந்தப் புத்தகத்தில் முதலாயிரம் தவிர்த்து, மற்ற ஆயிரங்களுக்கு அருஞ்சொல் அகராதி இருக்கிறது. அகராதி சொற்களை தொகுத்து,  மீண்டும் மீண்டும் வரும் வார்த்தைகளை நீக்கி, முதலாயிரத்தில் வரும் சில அருஞ்சொற்களை அத்து

இரண்டாம் பதிப்பு - பதம் பிரித்த பிரபந்தம் - அப்டேட்

 ஸ்ரீ  ஸ்ரீமதே ராமானுஜாய நம:  இரண்டாம் பதிப்பு - பதம் பிரித்த பிரபந்தம் தகவல் ( 7.4.2022) பங்குனி உத்திரம்(18.3.2022) அன்று  இரண்டாம் பதிப்பு குறித்த அறிவிப்பைப் பார்த்திருப்பீர்கள் ( பார்க்காதவர்கள் இங்கே படித்துக்கொள்ளலாம் ).  அதுகுறித்து மேலும் சில தகவல்கள்.  1. பலர் ஒரே புத்தகமாக இல்லாமல் இரண்டு புத்தகமாக இருந்தால் வசதியான இருக்கும் என்று விரும்பினார்கள். அதனால் இரண்டாம் பதிப்பு இரண்டு புத்தகங்களாக வரவிருக்கிறது.  அநுபந்தத்துடன் சேர்ந்து மொத்தம் மூன்று புத்தகங்கள்.  2. திவ்யப் பிரபந்தம் பிழை திருத்தம் நடைபெற்றுக்கொண்டு இருக்கிறது. அப்பணி இவ்வாரம் முடிவடையும்.  3. அநுபதம் வேலைகள் நடந்துகொண்டு இருக்கிறது. முடிக்க இன்னும் சில வாரங்கள் ஆகும்.  4. காகிதத்தின் விலை போன வருடத்தை விட  அதிகமாகியுள்ளது அதனால் புத்தகத்தின் விலை சற்று அதிகமாகும்.  5. முன்பதிவுக்குப் பலர் மின்னஞ்சல் அனுப்பியுள்ளார்கள். அவர்களுக்குப் பதில் அனுப்பவில்லை. புத்தகத்தின் உற்பத்திச் செலவு தெரிந்தவுடன் விலையுடன் பதில் அனுப்பப்படும். புத்தகம் முன் பதிவு செய்ய rdmctrust@gmail.com  என்ற முகவரிக்கு உங்கள் பெயர், முகவரி, தொ

தொடை நடுங்கி

தொடை நடுங்கி ‘சரியான தொடை நடுங்கி’ என்ற சொல்லை நிச்சயம் நாம் எல்லோரும் கேட்டிருப்போம்.  ’தொடை நிஜமாக நடுங்குமா’ என்ற சந்தேகமே வேண்டாம். தொடை நடுங்கும். எனக்கு நடுங்கியிருக்கிறது.  எப்படி என்று சொல்லுகிறேன். 2004ல் பெங்களூர் வந்த புதிது. அலுவலகம் செல்ல கார் வாங்கினேன்.  பொன்வண்டு போலப் பளப்பாக இருந்தது.  ஓட்டுநர் உரிமம் +12 விடுமுறையில் ஒரு அம்பாசிடர் கார் ஓட்டிக் காண்பித்தபோது ’பிழைத்துப் போ’ என்று கொடுத்தது. புதுக் காரை ஓட்ட தைரியம் இல்லாமல், “நீங்களே வீட்டுல டிராப் செய்துவிடுங்கள்”. கார் வீட்டுக்கு வந்தது. ஒரு வாரம் ஸ்டார்ட் செய்து விடியற்காலை யாரும் இல்லாத சமயம் அடுக்குமாடிக் குடியிருப்பை ஒரு வட்டம் அடித்துவிட்டு பார்க் செய்துவிடுவேன்.  ஒரு நாள் கொஞ்சம் தைரியம் வந்து அலுவலகத்துக்கு எடுத்துக்கொண்டு சென்றேன். ஒரு வாரத்துக்குப் பிறகு பெங்களூர் சாலைகள், சிக்னல், எஃப்.எம். வானொலியில் ‘Sakkath Hot Magaa’ எல்லாம் பழக்கப்பட்டது.  எல்லாம் நன்றாகச் சென்று கொண்டு இருந்த சமயம். ஒரு நாள் மழை வந்தது. அன்று மாலை அலுவலகத்திலிருந்து கிளம்பியபோது லேசான தூறல்தான். ’காரை மழையில் ஓட்டிப் பார்க்கலாம்’ என

திவ்யப் பிரபந்தமும், அநுபந்தமும் - அறிவிப்பு

 ஸ்ரீ  ஸ்ரீமதே ராமானுஜாய நம:  திவ்யப் பிரபந்தமும்,  அநுபந்தமும் - அறிவிப்பு கடந்த ஆண்டு ( 2022 ) ’ஆழ்வார்கள் திருவாய் மலர்ந்து அருளிய நாலாயிர திவ்யப் பிரபந்தம் புத்தகம்’  ராமானுஜ தேசிக முனிகள் அறக்கட்டளை வெளியீடாக வந்தது உங்களுக்கு நினைவிருக்கலாம்.  ஆயிரத்துக்கும் மேற்பட்ட  புத்தகங்கள் அச்சடிக்கப்பட்டு கோவிட் இரண்டாம் அலையின் போது எந்த பிரச்சனையும் இல்லாமல் பலருக்கு அனுப்பப்பட்டது. ஆழ்வார்கள், ஆசாரியர்கள், தாயார், பெருமாள் அனுக்கிரஹத்துடன் எந்த தடங்கலும் இல்லாமல் சென்றடைந்தது.  கூடிய விரைவில் இரண்டாம் பதிப்பு பிரபந்தம் கூடவே அநுபந்தத்துடன் வரவிருக்கிறது என்பதை இந்தப் பங்குனி உத்திரம் நன்னாளில் அறிவிப்பதில் மகிழ்ச்சி அடைகிறோம்.  ‘திவ்யம்’ என்ற சொல்லுக்கு ஆங்கிலத்தில் ‘divine’ என்று அர்த்தம் கொள்ளலாம். தமிழில் தெய்வத்தன்மை. ஆழ்வார்களை நாம் திவ்யசூரிகள் என்று அழைக்கிறோம்.  அவர்களுடைய கதைகளை திவ்யசூரி சரித்திரம் என்கிறோம். பாடிய பாசுரங்களை ‘திவ்ய’ பிரபந்தம் என்கிறோம். ஆழ்வார்கள் மங்களாசாசனம் செய்த தேசங்களை திவ்ய தேசம் என்கிறோம்.  நன்றாக கவனித்தால் ஆழ்வார்கள் சம்பந்தம் இருந்தால் மட்டுமே அது

தி காஷ்மீர் ஃபைல்

 தி காஷ்மீர் ஃபைல்  சுமார் இரண்டு வருடங்களுக்குப் பிறகு ’தி காஷ்மீர் ஃபைல்’  பார்க்க இன்று திரையரங்கிற்குச் சென்றேன். படத்தைப் பற்றிச் சொல்லும் முன் இன்று பங்குனி உற்சவம் எட்டாம் திருநாள்.  சுமார் 700 வருடங்களுக்கு முன் இதே நாளில் பங்குனி உத்ஸவம் ஆரம்பித்து எட்டாம் நாள் பன்றியாழ்வான்(வராகப் பெருமாள்) கோயிலில் அழகியமணவாளன் எழுந்தருளியிருந்த சமயம், அங்கே பன்னீராயிரம் ஸ்ரீவைஷ்ணவர்கள் குழுமியிருந்தார்கள்.  அந்தச் சமயத்தில் உலூக்கான் தலைமையில் முகம்மதியர்கள் ஊருக்குள் நுழைந்து,  கூடியிருந்த அனைத்து ஸ்ரீ வைஷ்ணவர்களையும் கொன்றுகுவித்தான். அன்று மட்டும் ஸ்ரீரங்கத்தில் 12,000 ஸ்ரீ வைஷ்ணவர்கள் கொல்லப்பட்டனர். இந்த இனப்படுகொலையை(genocide) “பன்னீராயிரம் முடி திருத்திய பன்றியாழ்வான் மேட்டுக்கலகம்” என்று கோயிலொழுகு குறிப்பிடுகிறது.  இதைக் குறித்து 2005ல் சுஜாதா விகடனில் கற்றதும் பெற்றதுமில் இப்படி எழுதியிருந்தார்.   ”அண்மையில் வைஷ்ணவஸ்ரீ அவர்கள் பதிப்பித்த அருமையான ‘கோயில் ஒழுகு’ புதிய பதிப்பைப் படிக்க ஆரம்பித்தேன் … ‘கோயில் ஒழுகு’ நூலில், ஆராய்ச்சிக்குரிய விஷயங்கள் என்று பதினோரு விஷயங்கள் குறிப்பிட

பாகவத திருப்பாவை - 26 ( மாலே! )

பாகவத திருப்பாவை - 26 ( மாலே! ) மாலே! மணிவண்ணா! மார்கழி நீராடுவான் மேலையார் செய்வனகள் வேண்டுவன, கேட்டியேல் ஞாலத்தை எல்லாம் நடுங்க முரல்வன பால் அன்ன வண்ணத்து உன் பாஞ்சசன்னியமே போல்வன சங்கங்கள் போய்ப்பாடு உடையனவே சாலப் பெரும் பறையே, பல்லாண்டு இசைப்பாரே கோல விளக்கே, கொடியே, விதானமே ஆலின் இலையாய்! அருள் ஏலோர் எம்பாவாய். “திருமாலே நானும் உனக்குப் பழ அடியேன்” என்கிறார் பெரியாழ்வார். ஆண்டாளோ ‘மாலே!’ என்கிறாள். மால் என்றால் என்ன பொருள் என்று தெரிந்துகொள்ளலாம்.  மால் என்றால் “வ்யாமோஹம்” என்ற வார்த்தையைக் குறிக்கிறது. எங்கோ கேட்ட மாதிரி இருக்கிறதா ? நாம் தினமும் சேவிக்கும் எம்பெருமானார் தனியனில் வரும் அந்த வார்த்தையைக் கீழே தேடுங்கள்.  யோ நித்யமச்யுதபதாம்புஜயுக்மருக்ம  வ்யாமோஹதஸ் ததிராணி த்ருணாய மேநே  அஸ்மத்குரோர் பகவதோsஸ்ய தயைகஸிந்தோ:  ராமா நுஜஸ்ய சரணௌ ஸரணம் ப்ரபத்யே. ஸ்ரீராம பாரதி ஆங்கிலத்தில் இரண்டு வரி அர்த்தம் தந்திருக்கிறார்.  “I surrender to Sri Ramanuja  the ocean of ’compassion’ who strove for the lord's feet as the only worthwhile possession and discarded all else as lightly a

ஜே.எஸ்.ராகவன் - அஞ்சலி

ஜே.எஸ்.ராகவன் - அஞ்சலி  எழுத்தாளர் சுஜாதா மறைந்தபோது எனக்கு ஒரு மின்னஞ்சல் வந்தது.  அதில்  ‘தமாஷா வரிகள் (304)’ – ’வைகுண்டம் டைம்ஸில்’ சுஜாதாவின் ‘கேள்வி பதில்கள்’ என்று ஒரு நகைச்சுவை பகுதி இணைக்கப்பட்டிருந்தது. கடைசியில் விகடனில் உங்கள் சுஜாதா கட்டுரை படித்தேன், ‘டச்சிங்’ – ஜே.எஸ்.ராகவன் என்று இருந்தது. அதற்குப் பிறகு அவருடன் சில மின்னஞ்சல் பரிமாற்றங்களுடன் எங்கள் தொடர்பு மங்கிப் போய், நான்கு வருடங்களுக்குப் பிறகு மீண்டும் பெங்களூர் குளிரில் துளிர் விட்டது. ஒரு நாள் காலை தொலைப்பேசியில் “நான் ஜே.எஸ்.ராகவன் பேசுகிறேன். நினைவிருக்கிறதா?  என் பையன் பெங்களூரில் இருக்கிறான். வந்திருக்கிறேன். சந்திக்கலாமா?” என்றார். “நல்லா நினைவு இருக்கிறது சார். பெங்களூரில் எங்கே?” விவரமாக விலாசத்தை சொல்லிவிட்டு “நீங்க எங்கே இருக்கேள் ? வரமுடியுமா?” என்றார். “உங்க ஃபிளாட்டை விட்டு கீழே இறங்கி வந்தால் வாசலில் ஒரு ஃபௌண்டன் இருக்கிறதா?” “ஆமாம்” “பத்து நிமிஷத்தில் நான் அங்கே இருப்பேன். நீங்க ‘C’ பிளாக் நான் ‘A’ பிளாக்” என்றேன். “நான் தமாஷா வரிகள் எழுதி மாம்பலம் டைம்ஸுக்கு அனுப்ப வேண்டும். அதனால் ஒரு மணி நேரம் க

உய்யும் ஆறு எண்ணி ...

 உய்யும் ஆறு எண்ணி ... திருப்பாவை இரண்டாம் பாசுரத்தில் ஆண்டாள் ‘உய்யும் ஆறு எண்ணி’ என்று கூறுகிறாள். இதற்குப் பொருள் ‘உஜ்ஜீவிக்கும் வழியை ஆராய்ந்து’... இதை ஆண்டாள் திருக்கச்சி ‘நம்பி’ சொன்ன ஆறு வார்த்தைகளை மனதில் வைத்துச் சொன்னாளோ என்று நினைத்ததுண்டு. நம்பிகள் ராமானுஜருக்கு அவர் சந்தேகங்களைப் பெருமாளிடம் கேட்டுத் தீர்த்துவைத்த கதை பிரசித்தம். அப்போது பெருமாள் திருக்கச்சி வாயிலாகச் சொன்ன அந்த ஆறு வார்த்தைகள் விசிஷ்டாத்வைத சித்தாந்தத்துக்கு மிக முக்கியமானவையாகக் கருதப்படுகின்றன. பொதுவாக நம் ஸ்ரீவைஷ்ணவ சம்பிரதாயத்தில் நமக்குப் பல சந்தேகங்கள் தோன்றும். அப்போது எல்லாம் பக்தி, சக்தி என்ற பத்திரிக்கைகளைப் படிக்காமல்,  இந்த ஆறு வார்த்தைகளைப் படித்தால் நிச்சயம் குழப்பம் இல்லாத விடை கிடைக்கும்.   இந்த ஆறு வார்த்தைகளில் ஸ்ரீபாஷ்யசாரம், ஸ்ரீமத் பகவத் கீதை, ஸ்ரீமத்ரஹஸ்யத்ரய சாரம் என்று எல்லாம் அடங்கியிருக்கிறது.  திருக்கச்சிகள் சொன்ன அந்த ‘உய்யும் ஆறு’ வார்த்தைகள் என்ன என்று பார்க்கலாம்.  1. அஹமேவ பரம் தத்வம் - எல்லா தத்துவங்களுக்கும் காரணமான பரத்துவம் நானே.  2. தர்சனம் பேத ஏவ - சித் ( ஜீவாத்மா ),