Friday, August 18, 2017

பொங்கும் பரிவு !

திருவாலி திருநகரி, திருமங்கை ஆழ்வார் பற்றி எழுதிய கட்டுரையில் “ஆழ்வார் பாசுரம் ஒன்று கூட இல்லையே?” என்று வாசகர் ஒருவர் கேட்டிருந்தார். கலியன் பாசுரம் ஏதாவது கிடைக்கிறதா என்று தேடும் போது சிறிய திருமடல், பெரிய திருமடல் இரண்டுக்கும் தனியன் எழுதியது ‘பிள்ளை திரு நறையூர் அரையர்” என்று கண்ணில் பட்டது.
போதுவாக தனியனைச் சேவிப்போம் ஆனால் அது எழுதியது யார் என்று நாம் கவனிக்க மாட்டோம். திருவாலியில் இருக்கும் திருமங்கை மன்னன் அர்ச்சா ரூபம் நிஜம் என்று எழுதியிருந்தது நினைவிருக்கலாம். அர்ச்சை என்றால் என்ன சார் எங்களுக்குப் புரியும் படி எழுதவும் என்று ஒருவர் சொல்லியிருந்தார் அவருக்காக இந்தச் சின்ன விளக்கம்
எம்பெருமான் திருக்கோயில்களில் இருக்கும் நிலை அர்ச்சை. ஆழ்வார்கள் பக்தியுடன் சேவித்ததால் “திருக்கண்டேன் பொன்மேனி கண்டேன்” என்று பாசுரம் பாட முடிந்தது. நாம் பார்க்கும் போது அது ‘சிலை’ என்று நினைப்பதால் பூர்ணமாக பக்தி செய்ய முடிவதில்லை.
அர்ச்சா மூர்த்தி தான் தனக்குப் பிரியமானது என்கிறார் ஆளவந்தார்(சதுஸ்லோகீ) . ரஹஸ்யத்ரயஸாரத்தில் வேதாந்த தேசிகன் திருமங்கை ஆழ்வார் தம்மை பெருமாளின் விஷயத்தில் தேஹாத்மவாதியாக ஈடுபடச் செய்வார் என்கிறார்.
திருமங்கை ஆழ்வாரோ “நெஞ்சு உருகிக் கண்பனிப்ப நிற்கும் சோரும் நெடிது உயிர்க்கும்” என்றும் “பெருகயல் கண்ணீர் அரும்பப் போந்து நின்று” என்று திருநெடுந்தாண்டகத்தில் உருகிறார்.
பிள்ளை உரங்காவில்லி தாஸர் நம்பெருமாள் புறப்பாடு கண்டருளும் போது ஒரு கத்தியை பிடித்துக்கொண்டு சேவித்து வருவாராம். பெருமாள் திருமேனிக்கு ஏதேனும் அசைவு ஏற்பட்டால், அந்தக் கத்தியால் தம்மைக் குத்திக்கொண்டு உயிரை விட்டு விடுவதற்காகவே அப்படிச் செய்வாராம். பரிவு என்று சொல்லுவதைவிட இதைப் பொங்கும் பரிவு என்றே சொல்ல வேண்டும்.
ஸ்ரீராமாயணக்கதை கேட்ட போது ராமர் சீதையைக் மீட்க அரக்கர்களுடன் போர் புரிந்தார் என்பதைக் கேட்டு உணர்ச்சிவசப்பட்டு சண்டை போட தன் படையைத் தயார் செய்தார்
குலசேகர ஆழ்வார் என்று படித்திருக்கிறோம். எப்படியும் உருக முடியுமா ? என்று நினைக்கலாம். இது தான் பொங்கும் பரிவு !
பொங்கும் பரிவுக்கு நம் பிள்ளை திருநறையூர் அரையர் பற்றி ஒரு சம்பவம் சொல்கிறேன்.
தொட்டியம் ( ஸ்ரீரங்கம் அருகே இருக்கும் ஊர்) திருநாராயணபுரத்திலே இருக்கும் சந்நிதியில் அர்ச்சாவதார பெருமாளுக்கு சில பகவத் விரோதிகள் நெருப்பை வைத்தனர் ( அந்த காலத்திலேயும் இருந்திருக்கிறார்கள் ! ). இதைப் பார்த்த அரையர் உடனே எம்பெருமான் திருமேனிக்குண்டான ஆபத்தைக் கண்டு தாமும், மனைவியும், பிள்ளைகளுடன் குடும்பத்துடன் அத் திவ்விய மங்கள விக்கிரகத்தைக் அணைத்துக் கொள்ள நெருப்பும், புகையும் சூழ குழந்தைகள் மூச்சுவிட முடியாமல் திணறி ”பொறுக்கமுடியவில்லையே!” என்று கூற அதற்கு அரையர் “இன்னும் கொஞ்சம் நேரம் தான், துன்பம் பிறகு பெருமாள் திருவடிகளில் சுகமாக இருக்கலாம். அதுவரை பொறுத்துக்கொள்ளுங்கள்” என்று
குடும்பத்துடன் உயிரைத் தியாகம் செய்தார்கள்.
பட்டர் காலத்தில் வாழ்ந்த பிள்ளை திருநறையூர் அரையர் பற்றி பல குறிப்புகள் வருகிறது. பாசுரங்களின் பொருள்நயம், இசைநயம் முதலியவை குறித்து இவர் பல சர்ச்சகைகள் செய்திருக்கிறார். உதாரணமாக
”சங்கு சக்கரங்கள் என்று கைகூப்பும்” என்று இருக்கிறதே சங்கு என்று ஒருமையில் கூறிவிட்டு சக்கரங்கள் என்று பன்மையில் ஏன் கூறப்பட்டுள்ளது ? என்று கேட்டிருக்கிறார்.
எம்பாரிடமும், பட்டரிடமும் நிறை கேள்விகள் கேட்டிருக்கிறார்.
பட்டரைவிட வயது அதிகமாக இருந்தாலும் பட்டர் மீது மிகுந்த மரியாதையும் மதிப்பும் வைத்திருந்தார்.
பிள்ளை திருநறையூர் அரையரும் பட்டரும் திருவரங்கம் திருக்கோயிலை ப்ரதக்ஷணம் செய்யும் போது மற்றவர்கள் வேகமாகக் குதிரைபோல ஓட்டமும் நடையுமாகச் செய்வார்களாம். ஆனால் அரையரும் பட்டரும் நின்று நிதானமாகக் கோயிலில் மண்டபங்களையும், கோபுரங்களையும் கண்களால் ரசித்துக்கொண்டு ஒரு பிள்ளைத்தாச்சி மாதிரி அடிமீது அடிவைத்து கோயிலை வலம்வர பல நாழிகைகள் எடுத்துக்கொள்வார்களாம். இவர்களை பின் தொடந்த நஞ்சீயர் “உண்பது, உடுப்பது முதலிய செய்ல்களில் மற்றவர்களை போல இருந்தாலும் கோயிலை சுற்றுவதில் தான் என்ன ஒரு வேறுபாடு!. மற்றவர்கள் வேகமாக ஏதோ பலன் கருதி வலம் வர இவர்கள் வலம் வருவதையே பலனாக கொண்டுள்ளார்கள். அதுவும் வலம் வரும் போது பெரிய பெருமாளை மங்களாசாஸனம் செய்கிறார்கள்” என்று வியந்துள்ளார்.
கோயிலை எப்படி அனுபவிக்க வேண்டும் என்பதற்கு எடுத்துக்காட்டு. அதே போல் திருவாய்மொழியை எப்படி அனுபவிக்க வேண்டும் என்றும் ஒரு எடுத்துக்காட்டு இருக்கிறது
பிள்ளை திருநறையூர் அரையரிடம் மூன்று திருவாய்மொழிகளுக்கு பொருள் கேட்டேன். அவர் என்ன சொன்னார் என்று நினைவில்லை, ஆனால் அவர் திருவாய்மொழிப் பாசுரங்களுக்கு பொருள் கூறத்தொடங்கி அப்பாசுரங்களில் மிகவும் ஈடுபட்டுக் கண்ணீர் விட்டார் என்பது மட்டும் நினைவிருக்கு என்றாராம் நஞ்சீயர். மீண்டும் தலைப்பை ஒரு முறை படியுங்கள் !
பிகு: அடுத்த முறை பிள்ளை திருநறையூர் அரையரை சேவிக்க திருச்சி செல்ல வேண்டும் என்று எண்ணிக்கொண்டு இருக்கிறேன்.

திருவாலி திருநகரி - மீண்டும் பயணம்

கல்லணை வழியாகத் திருவாலி திருநகரிக்கு திருமங்கை ஆழ்வாரைத் தரிசிக்க புறப்பட்ட போது குழந்தை வாயில் ஜொள் ஒழுகுவது போல மெதுவாக ஆங்காங்கே காவிரியில் தண்ணீர் ஒழுகிக்கொண்டு இருந்தது. (இங்கேயும்) மணல் லாரிகளின் வரிசையைக் கடந்து கல்லணை பாலத்தில் மயிரிழையில் எதிரே வரும் வண்டியை உரசாமல் திருவையாறு வரை வந்த போது தனியாவர்த்தனம் செய்த உணர்வு கிடைத்தது.
தனியாவர்த்தனம் முடித்த பின் துக்கடாவாக சாலை போட வழியை அடைத்து எங்களைத் திருப்பிவிட மாற்று வழிப் பாதையில் எரிச்சலுடன் வண்டியை ஓட்டிய போது அது நேராக
திருமங்கை ஆழ்வார் மங்களாசாசனம் செய்த திருவிண்ணகரம் என்னும் ஒப்பிலியப்பன் சன்னதி வாசலில் கொண்டு வந்து விட்டது. அர்ச்சகர் பெருமாள் கையில் இருந்த மாலையை அடியேனுக்குக் கொடுத்து ’நல்லா சேவிச்சிக்கோங்க’ என்று என்னை திருநகரிக்கு வழி அனுப்பிவைத்தார்.
வழி நெடுகிலும் வயல்களில் வரும் சுத்தமான காற்றைச் சுவாசித்துக்கொண்டு திருநகரிக்கு சென்றோம். ஓர் உடைந்த பாலம் பக்கத்திலேயே ஒரு புதிய பாலம் இருந்தது அதில் போக
முடியாதபடி முள், டிரம் போட்டு அடைத்திருந்தார்கள். விசாரித்த போது அரசியல் தலைவர் வந்து திறந்துவைக்க காத்துக்கொண்டு இருக்கிறது !
சீர்காழி பக்கம் இருக்கும் திருவாலி திருநகரி திவ்யதேசம் பற்றி சீர்காழி, மயிலாடுதுறை சுற்றி இருக்கும் மக்கள் பலருக்கு தெரியாதது வியப்பே. ஆட்டோ ஓட்டுநர்களிடம் பேச்சு கொடுத்தால் அவர்களுக்கும் தெரிவதில்லை. போன முறை சென்ற போது ஒரு ஆட்டோ டிரைவர் ”சார் நான் இந்த ஊர் தான் ஆனால் இந்தக் கோயில் இருப்பது நீங்கச் சொல்லி தான் தெரியும்!” என்றார்.
மற்ற ஆழ்வார்கள் பற்றி தெரியாது ஆனால் இங்கே திருமங்கை ஆழ்வார் இன்னும் வாழ்ந்துகொண்டு இருப்பதாக நம்புகிறேன். அர்ச்சா வடிவத்தைப் பார்த்தால் உங்களுக்கே அது புலப்படும். தனியாக கொஞ்ச நேரம் ஆழ்வாருடன் இருந்தால் ”என்னப்பா சௌக்கியமா ?” என்று பேசிவிடுவார்.
ஆகஸ்ட் 15, திருக்கார்த்திகை திருமங்கை ஆழ்வார் மாத திருநட்சத்திரம் அன்று திருமஞ்சனம் கண்டருளும் ஆழ்வாரைச் சேவிக்க வேண்டும் என்று ஆவல். அடியேன் எழுதும் பதிவுகளை படித்துவிட்டு “you are blessed” என்று கமெண்ட் போடுவார்கள். ஆனால் இந்த முறை அது நிஜமாகவே நடந்துவிட்டது.
நான் திருநகரிக்கு வருகிறேன் என்று Embar Ramanujan ஸ்ரீ எம்பார் ராமானுஜன் ஸ்வாமி அவர்கள் ( இன்னும் சில நாளில் அறுவை சிகிச்சை வேறு நடக்க இருக்கிறது ) என்னை திருநகரியில் நன்றாக’கவனித்துக்’கொள்ள வேண்டும் என்பதற்காக 80 வயதில் சென்னையிலிருந்து புறப்பட்டு திருநகரிக்கு வந்துவிட்டார்.
ஸ்ரீராமானுஜர் பிள்ளை உறங்கா வில்லி தாஸருக்கு ’என் அமுதினை கண்ட கண்களை’ காட்டி இதைவிட வேறு கண்ணழகன் உண்டா என்று கேட்டது போல ஸ்ரீ எம்பார் ராமானுஜன் ஸ்வாமி திருமங்கை ஆழ்வார் வடிவழகை காண்பித்தார் என்றால் மிகையாகாது.
ஒவ்வொரு முறை திருநகரிக்கு செல்லும் போதும், ஸ்ரீமணவாள மாமுனிகள் கலியனை பற்றி எழுதிய வடிவழகு தான் நினைவுக்கு வரும். திருமஞ்சனம், சாற்றுமுறை, பிரசாதம் என்று எல்லாம் முடிந்து மீண்டும் பெங்களூருக்கு வந்து சேர்ந்து மீண்டும் எப்போது போகலாம் என்று யோசித்துக்கொண்டு இருக்கிறேன்.
இந்தக் கோயிலில் கிணற்றுப்பக்கம் சில கல்வெட்டுக்கள் இருக்கிறது. அதைப் பற்றி நண்பர் Chithra Madhavan சித்ரா மாதவனிடம் கேட்டிருந்தேன் அவர் அளித்த தகவல் இவை 1517AD கிருஷ்ணதேவ ராயர் வெற்றி பெற்ற தகவல் மற்றும் ஆலயங்களுக்கு கொடுத்த வரி ஓர் கல்வெட்டு. இன்னொரு கல்வெட்டில் வேதம் ஓதிய பிராமணர்களுக்கு நிலம் நன்கொடையாக வழங்கியது பற்றி இருக்கிறது. வயலாலி மணவாளனுக்கு நிலம், மாடு, பாத்திரம் கொடுத்தது பற்றி ஒரு கல்வெட்டு இருக்கிறது.
பலர் சென்று அனுபவிக்க வேண்டிய திவ்ய தேசம். ஒரு குழுவாக சேர்ந்து போகலாம், அப்படி போவதாக இருந்தால் சொல்லுங்கள் அலுவலகத்துக்கு லீவு போட்டு விட்டு உங்களை அழைத்துச் செல்கிறேன். நம்மைக் கவனித்துக்கொள்ள ஆழ்வாரும் எம்பார் ராமானுஜன் ஸ்வாமியும் இருக்கவே இருக்கிறார்கள்.
ஸ்ரீரங்கத்தில் சூப்பர் மார்கெட்டில் சில வாரங்களுக்கு முன் வந்த நெருங்காதே நீரிழிவே புத்தகம் வியப்பை அளித்தது. “சார் நல்ல போகுது” என்றார் கடைக்காரர். மேலும் ஒரு ஆச்சரியம் என் பழைய நண்பனை(திருச்சி GHல் மருத்துவராக இருக்கிறான்) பல வருஷங்கள் கழித்து சந்தித்தேன் “நீ எழுதிய புத்தகம் ஈரோடு சென்ற போது போஸ்டரில் பார்த்தேன். இப்ப என்னிடம் வரும் நீரிழிவு பேஷண்டுகளுக்கு அதைப் பரிந்துரைக்கலாம் என்று இருக்கிறேன் என்றான். இவ்வளவு சீக்கிரம் கொண்டு சென்ற Badri Seshadri பத்ரிக்கு நன்றி.

பகல் கொள்ளை, இரவு கொள்ளை


ஆகஸ்ட் 15ம் தேதி இந்த வருடம் லாங் வீக்கெண்டாக சுதந்திரத்தை அனுபவிக்க பெங்களூருவை காலி செய்து ஸ்ரீரங்கத்துக்கு புறபட்டேன். 
என்னை போலவே பலர் காலி செய்ததால் போக்குவரத்து நெரிசலை கடந்து 
கிருஷ்ணகிரியில் இருக்கும் A2Bக்கு வர நான்கு மணி நேரம் ஆனது. அங்கே பில்லுக்கு, 
காபிக்கு, டாய்லட்டுக்கு என்று எங்கு பார்த்தாலும் டிராபிக் ஜாம். கிழிஞ்சுது கிஷ்ணகிரி 
என்பதற்கு நேற்று தான் அர்த்தம் தெரிந்தது.
நாமக்கல் தாண்டிய பிறகு முசுறிக்கு முன் காவிரி மணல் ஆறாக காட்சிகொடுத்தது. அதன் 
நடுவே சாரை சாரையாக ஏதோ ஊர்ந்து சென்றுக்கொண்டு இருந்தது. இவ்வளவு பெரிய 
சைஸ் எறும்பா ? என்று உற்று பார்த்த போது எல்லாம் லாரிகள் அதன் வால் எங்கே 
இருக்கிறது என்று தேடிய போது கிட்டதட்ட ஒரு கிமீ தூரம் காவிரிக்கு அரணாக 
மறைத்துக்கொண்டு... காவிரியை மணல் குவாரிகளாகிவிட்டார்கள். பிறகு குணசீலம் 
தாண்டிய போது மீண்டும் அதே எறும்புகள்...ஒரு பெண்ணை பலர் ஒரே சமயத்தில் 
கற்பழிப்பதற்கு சமமாகும் செயல் இது. பகல் கொள்ளை.
ஸ்ரீரங்கம் முழுவதும் எல்லோரும் “தண்ணீர் முக்கொம்பு வரை வந்துவிட்டது.. நாளைக்கு 
அம்மாமண்டபம் வந்துவிடும்” என்று பேசிக்கொண்டிருந்தார்கள். இன்று நம்பெருமாள் ஆடி 
28ம் பெருக்கையொட்டி காவிரி தாய்க்கு சீர்கொடுக்கும் உற்சவம் இன்று நடைபெற 
போகிறது. நம்பெருமாள் காவிரி தாய்க்கு மாலை, பட்டுசேலை, சந்தனம், தாம்பூலம் 
போன்ற மங்கலப் பொருட்களை நாம் சீரழிக்கும் காவிரிக்கு சீர்கொடுக்கபோகிறார்!
கடவுள் நம்பிக்கை இல்லை, இயற்கையே கடவுள் என்று பேசும் கட்சிகளுக்கு சனாதன 
தர்மம் பற்றி தெரிந்திருக்க வாய்ப்பில்லை. இயற்கையை போற்றி பாதுகாப்பதே சனாதன 
தர்மம்.
சின்ன வயதில் ஸ்ரீரங்கம் கோயிலில் அரவணை பிரசாதம் சாப்பிட்டிருக்கிறேன். இரவு பத்து 
மணிக்கு மேல் தான் கிடைக்கும். சின்ன மண் பானையில் நெய் தளும்பத் தளும்ப 
ஒருவிதமான உப்பு வெல்லம் இரண்டு சேர்ந்த ருசியில் இருக்கும். எனக்கு தெரிந்த நண்பர் 
ஒருவரிடம் ”அரவணை கிடைக்குமா ?” என்றேன் “ஸ்வாமி இன்று கூட்டம் அதிகம்.. பத்தே 
முக்காலுக்கு வாங்க எடுத்துவைக்கிறேன்” என்றார். பத்தே முக்காலுக்கு சென்ற போது 
கூட்டத்தை வெளியே அனுப்பிக்கொண்டு இருந்தார்கள். கருட மண்டபத்தில் கொண்டையுடன் 
இருந்த நாயக்க சிற்பங்களை அமுதனுக்கு காமித்துக்கொண்டு இருந்தேன்.
ஸ்ரீரங்கம் இரவு நேரத்தில் பார்ப்பதே சுகம். கூடவே கொஞ்சம் தூறல் என்றால் ? கேட்கவே 
வேண்டாம்! ரசித்துக்கொண்டு இருந்த போது, ஒருவர் “ஆரத்திக்கு உள்ளே போங்க.. ” என்று 
வேகமாக எங்களை ஆரியபடாள் வாசல் வழியாக உள்ளே அனுப்ப, சந்தனு மண்டபத்தில் 
சமர்த்தாக உட்கார்ந்துக்கொண்டோம். பெருமாளுக்கு பிரசாதம் கண்டருள செய்யும் போது 
அங்கே பெரிதாக வாத்தியம் இசைத்தார்கள். இந்த வாத்திய ஒலிப்பற்றி ஒரு சின்ன குறிப்பு.
கூரத்தாழ்வானும் அவர் மணைவி ஆண்டாளும் ஸ்ரீரங்கத்தில் இருந்த சமயம் ஒரு நாள் 
நல்ல மழை! அவரால் வெளியே செல்ல முடியவில்லை. ஆழ்வானும், ஆண்டாளும் அன்று 
பட்னி.
இரவு கோயிலில் அரவணை மணி சத்தம் கேட்கிறது. ஆழ்வான் மீது இருந்த பற்றினால் 
ஆண்டாள் ”உன் பக்தன் இங்கு பட்டினியாக கிடக்க..... ” என்று ஒரு நெடி யோசித்தார். 
யோசித்த மறு நொடி அரங்கன் அர்ச்சகர் மூலமாக ஆவேசித்து “ஆழ்வானுக்கு பிரசாதம் 
அனுப்பிவையும்” என்று கூற, கோயில் உத்தமநம்பி மூலமாக சகல மரியாதையுடன் 
பிரசாதம் ஆழ்வான் திருமாளிகைக்கு வந்து சேர ஆழ்வான் “எதுக்கு ?” என்று வினவ 
“நம்பெருமாள் நியமனம்” என்றார் உத்தமநம்பி.
ஆழ்வான் இரண்டு கவளம் ( தனக்கும், ஆண்டாளுக்கும் ) பெற்றுக்கொள்கிறார். உத்தமநம்பி 
சென்ற பிறகு ஆழ்வான் ஆண்டாளை பார்த்து “நீ ஏதாவது நம்பெருமாளிடம் வேண்டினாயோ 
?” என்று கேட்க ஆண்டாள் தான் நினைத்ததை கூறினாள். “குழந்தை தாயை பார்த்து 
என்னை காப்பாத்து என்று கேட்குமோ ? உலகத்துக்கே படியளக்கும் நம்பெருமாள் 
அடியார்களை மறந்துவிடுவானோ ?” என்று கூறிவிட்டு பிரசாதத்தை ஸ்வீகரித்தார்கள் 
(உண்டார்கள்). அதன் பிறகு அவர்களுக்கு இரண்டு குழந்தைகள் பராசர பட்டர், வேதவ்யாச 
பட்டர் பிறக்கிறார்கள். ( கூரத்தாழ்வான் தனது தர்மபத்னியுடன் உடல் சம்பந்தம் 
வைத்துகொண்டதில்லை இவருடைய குழந்தைகள் ஸ்ரீரங்கநாதனுடைய (அரவணைப் 
பிரசாதம்) கடாக்ஷத்தினாலேயே அவதரித்தனர் என்பார்கள் )
பெருமாளுக்கு ஆர்த்தி, திருவாலவட்டம் என்று நம்பெருமாள் அந்த இருட்டில் மனதைக் 
இரவு கொள்ளை அடிக்க மழை இன்னும் அதிகமாக.. பிரியப்பட்டு நனைத்துக்கொண்டு 
வந்தோம்.
வீட்டிக்கு வந்த பிறகு, அமுதனிடம் கால் எல்லாம் சேறு காலை அலம்பிக்கோ என்று 
சொன்னேன். “இங்கே ராமானுஜர் நடந்த இடம் என்று சொன்னே.. அந்த சேறு தானே இது, 
அலம்பிக்கனுமா ?”
நேற்றைய ஸ்ரீரங்கத்து அனுபவத்துக்கு காரணம் ஸ்ரீரங்கம் செல்லும் முன் உரையூர் நாச்சியார் கோயில் சென்றது தான் 
என்று நம்புகிறேன் ! ( (கமலவல்லி தாயார், திருபாணாழ்வார் - மெதுவா சேவித்துவிட்டு போங்கோ!)
- சுஜாதா தேசிகன் 
13.8.2017
ஆடி 28, ஒரு மழை நாள்