Monday, January 19, 2009

புத்தகக் காட்சி 2009 ( Book Fair 2009 )

வீடு மாற்ற சரியான தருணம் எது?


1. வீட்டில் பாத்ரூம் சரியில்லை
2. பக்கத்து வீட்டுக்காரருடன் சண்டை
3. அடுத்த மாதம் புத்தகக் கண்காட்சி



விடை - 3.


போன வருட இறுதியில் கொஞ்சம் பெரிய வீட்டுக்குப் போனால் நன்றாக இருக்குமே என்று எண்ணி, எங்கள் வீட்டுக்குப் பக்கத்தில் 100 அடி தள்ளி வேறு வீட்டுக்குக் குடிபெயர்ந்தோம்.


புது வீட்டுக்குப் போவது என்பது கிட்னிக்கு டயாலிசிஸ் மாதிரி. வீட்டில் இருக்கும் குப்பைகள் எல்லாம் ஒழிந்தன. என்றோ காணாமல் போன வஸ்துக்கள் புதையலாகக் கிடைத்தன. “அட நான் ஸ்கூல் படிக்கும் போது உபயோகித்த பேனா, ரொம்ப நாளா தேடிக்கிட்டு இருந்தேன்”. சில பொருட்கள் புதையலாக மறைந்து போகும். “என் காது தோடோட திருகை எங்கே போட்டீங்க, எங்க அம்மா கல்யாணத்துக்கு வாங்கித் தந்தது”.


”புது வீட்டுக்கும் எல்லா புத்தகங்களையும் அள்ளிக்கட்டிண்டு வந்தீங்கன்னா..” என்ற சின்ன எச்சரிக்கையே சப்வே ”எதை எடுத்தாலும் பத்து ரூபா” பிளாஸ்டிக் சாமான் விற்கும் வியாபாரி போல ஆக்கியது. எல்லாப் புத்தகங்களயும் பரப்பிப் பார்த்த போது எனக்கே மலைப்பாக இருந்தது. எவ்வளவு புத்தகங்கள் படிக்காமல் அப்படியே இருக்கின்றன என்று. பல புத்தகங்கள் நான் வாங்கியவை, சில புத்தகங்கள் எனக்கு அன்பளிப்பாக வந்தவை.


டிக்‌ஷனரி, பிரபந்தம், சமையல் குறிப்பு போன்று அடிக்கடி தேவைப்படும் புத்தகங்கள் என்று பார்த்தால் இருபதுக்கு மேல் இல்லை. மீதம் உள்ள புத்தகங்களை வேண்டும், வேண்டாம் என்று பிரிக்க எனக்கு ஒரு முழு நாள் தேவைப்பட்டது. பிரித்ததில் வேண்டாம் என்று நான் கடாசிய புத்தகங்கள் கிருஷ்ணர் பக்திக்கு ஈடாக ருக்மணி குவித்த நகை போல் காட்சியளித்தது.


சித்தர் பாடல்களையும், மேனேஜ்மெண்ட் டெக்னிக்ஸையும் கட்ட நான்கு மூட்டை தேவைப்பட்டது. மூட்டைகளை வீட்டுக் காரிடரில் போய் வைத்துவிட்டு யார் வேண்டும் என்றாலும் எடுத்துக்கொள்ளாம் என்று திரும்பிப் பார்க்காமல் வந்துவிட்டேன். (சென்னையில் இருந்திருந்தால் ஏதாவது நூலகத்துக்குக் கொடுத்திருக்கலாம். )


புத்தகங்களை விட அனுபவம் நமக்கு நிறைய சொல்லிக்கொடுக்கிறது. இந்த முறை புத்தகக் கண்காட்சிக்கு சென்ற போது சட்டை பையில் நூறே ரூபாயுடன் சென்றேன்.
(மகளிர் சுய அமைப்பு விற்கும்) ஃபுரூட் பவுல், காப்பி, தண்ணீர் வாங்க)


போன முறை போலவே இந்த முறையும் நிறைய ஸ்டால்கள், நிறைய புத்தகங்கள். இவை எல்லாம் யாருக்காக எழுதப்படுகிறது? கூட்டம் ரொம்ப கம்மியாக இருந்ததால் ரிலாக்ஸ்டாகப் பார்க்க முடிந்தது.


”என்னை பார் யோகம் வரும்” படத்திற்கு பதில் இந்த முறை ஒபாமா. எல்லா ஸ்டால்களிலும் தவறாமல் புத்தக விலைப் பட்டியலைத் தருகிறார்கள். உயிர்மை அதைப் புத்தகமாகவே போட்டிருக்கிறார்கள்.


"பெண்களுக்கு ஏற்ற வசதியான உடை எது ?"
- சேலை,
-சுடிதார்,
-பேண்ட்


என்ற வாக்கெடுப்புக் கேள்வி பேக்ரவுண்டில் இருக்க (ஓ-பக்கங்கள்) ஞாநியை பார்த்து கொஞ்சம் நேரம் பேசிக்கொண்டிருந்தேன்.


“சார் நான் உங்கள் Fan,” என்று கையெழுத்து வாங்கிய இளைஞரை பார்த்து, “Dont be my Fan, be my reader," என்றார்.


கிழக்கு ஸ்டாலில் பத்ரியிடம் பேசிய போது “பெண்களின் அந்தரங்கம், ஆண்களுக்கு” என்ற புத்தகம் நன்றாக விற்பனை ஆகிறது என்றார். எழுதியவர் யார் என்று பார்த்த போது ‘நப்பின்னை’ என்று இருந்தது. இவர் (ஆண்) பிள்ளை என்ற ரகசியத்தைச் சொன்னார் பத்ரி.


பிராடிஜி ஸ்டாலில் ராமானுஜருக்குப் பக்கதில் பெரியாரும் அவருக்கு பக்கதில் அப்துல் கலாமும்....என்று அங்கே வரும் மாணவர்களை பார்த்து சிரித்துக்கொண்டிருந்தார்கள்.


“டேய் எவ்வளவுடா வெச்சிருக்கே ? “


“கூல் டிரிங்க்ஸ், சமோசா வாங்கணும்”
 
“சார் இந்தப் புத்தகம் எவ்வளாவு?”


“25 ரூபாய், 20% டிஸ்கவுண்ட் - 20 ரூபாய்”


“இந்த புத்தகம் கொடுங்க” என்று அரை நிஜார் பையன் அப்துல் கலாமை வாங்கிகொண்டு போகிறான். அவன் முகத்தில் 20 ரூபாய்க்கு புத்தகம் கிடைக்கிறது என்ற மகிழ்ச்சி தென்பட்டது. கிழக்கு பதிப்பகம் பத்ரிக்கு இது பெரிய வெற்றி என்பேன்.


[%image(20090119-GnaniDesikan.JPG|256|192|null)%]

அறிவியல் சம்பந்தமாக “விண்வெளி” என்ற புத்தகத்தை ஹரன் பிரசன்னா பில் போட, பெற்றுக்கொண்டேன். மற்றொரு பல்பு போட்ட அறிவியல் புத்தகத்தைத் தேடி பார்த்ததில் பல தீவிரவாதிகள் அதை மறைத்துக் கொண்டிருந்தார்கள். மற்றொரு கிழக்கு ஸ்டாலில் சத்யஜித்ரே என்ற பெரிய எழுத்து கீழே சாவி என்ற சின்ன எழுத்து புத்தகம் கண்ணில் பட்டது. புத்தகத்தைப் பார்த்தவுடன் சத்தியஜித்ரே பற்றி சாவி எழுதியது என்று நினைத்தேன். அப்பறம் தான் தெரிந்தது சத்தியஜித்ரே எழுதிய சாவி என்ற துப்பறியும் கதை அது. (இந்த ஸ்டாலில் எல்லா புத்தகங்களும் 25% டிஸ்கவுட் என்று ஒருவர் வந்து என் காதில் கிசுகிசுத்தார்.)


திமுக, அதிமுக, பாமக, மதிமுக, என்ற வரிசையில் தலைவலி என்ற புத்தகமும் அடுக்கி வைத்திருந்தார்கள். மினிமேக்ஸ் புது வரவு. எவ்வளவு பேர் வாங்குவார்கள் என்று தெரியவில்லை.


“சார் எனக்கு தடை செய்யப்பட்ட எல்லா புத்தகங்களும் அனுப்புங்க,” என்று ஒருவர் பணம் கட்டிக்கொண்டிருந்தார்.
 
“இன்னிக்கே அனுப்ப முடியுமா என்று பார்க்கிறேன்” என்று தன் மார்கெட்டிங் திறமையை வெளிப்படுத்திக்கொண்டிருந்தார் பிரசன்னா. கூட்டம் இருந்தாலும் இல்லாவிட்டாலும் பிரசன்னா பிஸியாகவே இருந்தார்.


விகடன் ஸ்டாலில் வழக்கம் போல் 500 ரூபாய்க்கு மேல் வாங்கினால் வாசன் மலரை இலவசம் என்று சொல்லிக்கொண்டிருந்தார்கள். அங்கே வந்த மதன் ரசிகர், “ஹாய் மதன் 2, 3, 4, 5 தான் இருக்கு; முதல் வால்யூம் எங்கே?”


“அது கிழக்கு பதிப்பகத்தில் போட்டிருக்காங்க”


”கிழக்குல நாலு புத்தகம் இருக்கு”


“அப்படியா முதல் வால்யூம் ஸ்டாக் இல்லாமல் இருக்கலாம்”


வந்தவர் சில நிமிடங்கள் யோசித்துவிட்டு லிப்கோ பதிப்பகத்துக்கு சென்று 15 ரூபாய்க்கு ஏதோ ஒரு ஸ்லோகம் புத்தகத்தை வாங்கிகொண்டு போனார்.


உயிர்மை ஸ்டாலில் இந்த முறை சுஜாதா இல்லாதது ஒரு பெரிய இழப்பு. புதிதாக சுஜாதாவின் ’கண்ணீரில்லாமல்’ கட்டுரை தொகுப்பு புத்தகம் வந்திருப்பதாக நண்பர் ஹமீத் சொன்னார். (நான் போன சமயம் அது வந்திருக்கவில்லை.)


முன்பு ஸ்ரீவைஷ்ணவஸ்ரீ (ஸ்ரீரங்கம்)-க்கு ஒரு ஸ்டால் ஒதுக்கியிருப்பார்கள், சில வருஷங்களாக அது மிஸ்ஸிங். கண்காட்சியின் மற்றொரு பயன் நண்பர்களைப் பார்க்க முடிகிறது. ரொம்ப நாளைக்குப் பிறகு ஜெயஸ்ரீயையும்(இங்கே இருக்கும் படம் அவர் எனக்கு எடுத்தனுப்பியது), ராஜாராமையும் சந்திக்க முடிந்தது. பாக்கியம் ராமசாமி ”நான் நினைத்ததைவிட நீங்க யெங்கா இருக்கீங்க,” என்றார்.  இயக்குனர் வசந்த் ”உங்க ராமாநுஜலு கதை படித்தேன்,” என்றார்.


காண்காட்சியில் வாங்கிய புத்தகங்கள்:
விண்வெளி - கிழக்கு
ஸ்ரீதர் ஜோக்ஸ் - விகடன்


கண்காட்சியில் வாங்க வேண்டும் என்று நினைத்த புத்தகங்கள்.


நேரு முதல் நேற்றுவரை - கிழக்கு
கண்ணீரில்லாமல் - சுஜாதா
சுஜாதாவை கேளுங்கள் - குமுதம்
கோபுலு - கிழக்கு


2006 - புத்தகக் கண்காட்சி
2007 - புத்தகக் கண்காட்சி
2008 - புத்தகக் கண்காட்சி

Saturday, January 3, 2009

திருப்பாவை

நான்கு வருடங்களுக்கு முன்பு மார்கழி மாதம் ஒவ்வொரு நாளும் திருப்பாவைக்கு (தமிழிலும், ஆங்கிலத்திலும் ) ஒரு படத்துடன் எளிய விளக்கமும் தந்தது நினைவிருக்கலாம். 2007 வருடம் திருப்பாவையில் வரும் உவமைகள் சில வற்றை எழுதினேன். 7 பாடல்களுடன் நின்றுவிட்டது,


இந்த வாரம் இரண்டு பாடலுக்காவது எழுத முடியுமா என்று பார்க்கிறேன்.


திருப்பாவை பதிவுகளை முன்பு பார்க்காதவர்கள், வலது பக்கம் உள்ள கிருஷ்ணர் படத்தை கிளிக் செய்து படிக்கலாம். 

சாக்லெட் கடவுள் வந்திருந்தார்

சுஜாதா மறைவிற்குப் பிறகு முதன்முறையாக டிசம்பர் இறுதியில் சென்னை சென்றிருந்தேன்.


சென்னை பனகல் பார்க், கோடம்பாக்கத்தில் ஸ்கூல் சறுக்கு மரம் போல் மேம்பாலங்கள் முளைத்திருக்கின்றன. போத்தீஸ் பக்கம் பத்து நிமிடம் நின்று பார்த்தபோது, 2 பஸ், 5 ஆட்டோ சில பைக்குகள் போயின. மேம்பாலத்துக்குக் கீழே வழக்கம்போல் அதே கூட்டம்.


இரண்டு நாடகங்களுக்குப் போக முடிந்தது. கிரேஸி மோகனின்,-"சாக்லேட் கிருஷ்ணா", பூர்ணம் நியூ தியேட்டர்ஸ் (பூர்ணம் குருகுலம்)  பூர்ணம், சுஜாதா நினைவாக - "கடவுள் வந்திருந்தார்."



[%image(20090102-crazy_mohan.jpg|227|176|null)%]

சாக்லெட் கிருஷ்ணாவிற்கு என் மகளை அழைத்துக்கொண்டு சென்றிருந்தேன். அவளுக்கு இது முதல் நாடகம் அனுபவம். போன சமயம் கிரேஸி மோகன் மேக்கப் இல்லாமல் "வாங்க தேசிகன்," என்று வரவேற்று கெஸ்ட் டிக்கேட் கொடுத்து உட்கார வைத்தார். ( கிரேஸி இதை 119 வது தடவை போடுகிறார் )


கதை ரொம்ப சிம்பிள். மாதுவிற்கு பல பிரச்சினைகள் (தங்கை கல்யாணம், பிரமோஷன், அப்பாவிற்கு கச்சேரி சான்ஸ்...). "கிருஷ்ணா ஒரு வழி சொல்லேன்" என்று வேண்ட, கிருஷ்ணா கிரேஸியாக மூக்கு கண்ணாடி மீசையுடன் வருகிறார்.


கிருஷ்ணருக்கு மீசை உண்டா என்று கேட்டால், பார்த்தசாரதிக்கு மீசை இருக்கே என்று பதில். இது மாதிரி நாடகம் முழுக்க இந்த கிருஷ்ணர் அடிக்கும் லூட்டிதான் சாக்லேட் கிருஷ்ணா. நடுநடுவில் சாக்லெட் கிருஷ்ணர் சர்கார் கிருஷ்ணராக மாறி மேஜிக் பண்ணுகிறார். ஸ்ரீவில்லிப்புத்தூர் ஆண்டாளுக்கு கிளியை கர்ச்சீப் ஆக்கி அனுப்புகிறார். குச்சியை பொக்கே ஆக்குகிறார். கருப்பு துணியின் கலரை மாற்றுகிறார். இவைகளை என் மகள் விரும்பிப் பார்த்து ரசித்தாள். நாடகம் முழுக்க சிரிப்பு மழை, எதிர் சீட்டில் ஒரு கிழவர் விழுந்து விழுந்து சிரித்தார், அடிபடாமல்.


நாடகம் முடிந்து,  நாரதகான சபா கேண்டீனில் தோசை ஆர்டர் செய்தேன். ஒரு பெரிய கல்லில் எட்டு தோசையை வார்த்தார். பிறகு அதை எடுக்க முயன்றார் முடியவில்லை. பெயர்த்து எடுத்து குப்பைத் தொட்டியில் போட்டார். மீண்டும் தோசை - குப்பை தொட்டி.  தோசை க்யூ, ஃபாமிலி தோசை மாதிரி நீளத் தொடங்கியது. "அப்பா கிருஷ்ணா மாமா உனக்கு ஃபிரண்டு தானே, அவரைக் கூப்பிடு" என்றாள் மகள் பொறுமையில்லாமல். "கிருஷ்ணருக்கு தோசை வார்க்கத் தெரியாது, சாப்பிடத் தான் தெரியும்" என்று சொல்லி சமாளித்தேன்.


மேனேஜர் மாதிரி ஒருவர் வந்து அல்லது கிருஷ்ணர் மேனேஜராக வந்து, தோசைக்கல்லில் வெங்காயத்தைக் கொட்டி பிறகு அதில் எண்ணையை ஊற்றி, கல்லைச் சுத்தம் செய்தார். தோசை மாவில் கொஞ்சம் மைதாவைக் கலந்து தோசை வாத்தார். தோசை திருப்பிப் போடாமல் அதுவாகத் திரும்பிக்கொண்டது.


கிரேஸி மோகன் நாடகத்தில் கடவுள் தோன்றி அதனால் விளையும் குழப்பங்கள் கதை என்றால் கடவுள் வந்திருந்தார் நாடகத்தில் எதிர்கால மனிதன் தோன்றுவதால் விளையும் குழப்பங்கள் தான் கதை.


சென்னையில் இருந்த போது கடவுள் வந்திருந்தார் நாடகம் பல முறை பார்த்திருக்கிறேன். சுஜாதாவுடனே இரண்டு  மூன்று முறை பார்த்திருக்கிறேன். நாடகம் முழுக்க பூர்ணம் தான் இருப்பார், மற்றவர்கள் எல்லாம் தெரியவே மாட்டார்கள்.


கடவுள் வந்திருந்தார் நாடகத்தில் எதிர்கால மனிதன் வந்தால் எப்படி இருக்கும் என்று பூர்ணம் நினைக்க, திடுதிப் என்று எதிர்கால மனிதன் ’ஜோ’ வந்துவிடுவார்.


பூர்ணம் மறைவிற்கு பிறகு திரு.மூர்த்தி அந்த பாத்திரத்தை ஏற்று நடித்திருக்கிறார். மிகவும் நன்றாகவே அதை செய்திருக்கிறார். நாடகத்துக்கு பூர்ணம் மனைவி, மகள் வந்திருந்தார்கள். பூர்ணம், சுஜாதா மறைவிற்கு பிறகு அவர் நினைவாக ஒரு நாடகம் போட வேண்டும் என்று விரும்பினாராம். ஆனால் அந்த ஆசை நிறைவு பெறுவதற்கு முன்பே அவரும் உடல்நலம் குன்றி, காலமானார். அதனால் அவருடைய இறுதியாத்திரையில் தகனம் செய்ய எடுத்துச் செல்லும்போதும் அவருக்கு நாடக மேக்கப் போட்டே தகனத்துக்கு எடுத்துப் போனார்கள் என்று சொன்னார் அவர் மனைவி.


சென்னைக்கு இந்தமுறை காரில் சென்று வந்ததால், காஞ்சிபுரம் பக்கத்தில் திருப்புட்குழி திவ்விய தேசத்தைப் பார்க்க முடிந்தது. மூலவர் - விஜயராகவ பெருமாள், தாயார் மரகதவல்லி.


[%image(20090102-tputkuzhi.jpg|265|175|null)%]

ராமர் ஜடாயுவிற்கு (புள்-பறவை) ஈமக் கடன்களைச் செய்த ஸ்தலம் என்று இதற்கு ஒரு தனிச் சிறப்பு உண்டு. ஈமக் கடன்களைச் செய்திடும்போது செய்பவரின் மனைவியும் உடன் இருப்பது சிறப்பு. விஜயராகவப் பெருமாளின் வலப்புறம் இருந்திட வேண்டிய பெரிய பிராட்டி இடப்புறமாகவும், இடப்புறம் இருந்திட வேண்டிய பூமாதேவி வலப்புறமாகவும் இருப்பதை இங்கே பார்க்கலாம். ஜடாயுவிற்கு ஈமக் கடன்களை செய்யும் போது அக்னி ஜ்வாலையின் வெப்பத்தைத் தாளமுடியாமல் பூமா தேவி தலையை பெருமாள் பக்கம் சாய்த்தபடி காட்சியளிக்கிறார். (ஸ்ரீதேவி இடப்பக்கத்தே இருப்பது இங்கும் திருவிடந்தையில் மட்டும்தான்.)


இத்தலத்திற்குக் கூறப்படும் அதே வரலாறு புள்ளம் பூதங்குடி ஸ்தலத்துக்கும் கூறப்படுகிறது. எது உண்மை என்ற ஆராய்ச்சி இந்தப் பதிவுக்கு தேவை இல்லை.


திருமங்கையாழ்வாரால் "புலங்கெழு பொருநீர்ப் புட்குழி' என்று மங்களாசாஸனம் செய்யப்பட்டுள்ளது. இந்த ஊரில் வாழ்ந்த யாதவப் பிரகாசர் என்பவரிடம் ஸ்ரீராமானுஜர் பாடங்களை படித்த இடமும் இருக்கிறது. தேசிகரும் மணவாள மாமுனிகளும் அபிமானித்த தலம் இது. இக்கோயிலில் பாண்டிய, விஜயநகரப் பேரரசுடைய கல்வெட்டுகள் எந்த ஐ.டியும் படையெடுக்காததால் இன்றும் இருக்கிறது.