Wednesday, May 31, 2006

மீண்டும் மூளைக்கு வேலை

போன வருடம் டிசம்பர் மாதம் "மூளைக்கு கொஞ்சம் (ஓவராக) வேலை" என்ற பதிவுவை பார்த்திருப்பீர்கள். இன்னுமும் எனக்கு 'நான் இந்த Levelல்' இருக்கிறேன் எனக்கு உதவுங்கள்  என்று  ஈமெயிலில் என்னன சிலர் கேட்பதுண்டு. இந்த புதிர் இணையத்தில் நிஜமாகவே ஒரு பெரும் வெற்றி அடைந்தது.


இதை தயாரித்த IIM Indore மாணவர்கள் இதற்கு தனியாக http://www.playklueless.com என்ற வலைத்தளத்தை ஆரம்பித்திருக்கிறார்கள்.


அதில் Hall of Fame என்ற தொடுப்பில் வரிசை எண் 455ல் ஒரு விஐபி பேர் இருக்கிறது :-)

Tuesday, May 30, 2006

சித்திர நாலாயிரம்


நேற்று ஸ்ரீரங்கம் பெருமாளை ஓசி பாஸ் மூலம் தரிசித்து விட்டு வரும் வழியில் வடக்கு சித்திர வீதியில் திரு S.R.ஸ்ரீநிவாசன் அவர்களின் ஓவிய கண்காட்சிக்கு சென்றது ஒர் இனிய அனுபவம்.



[%image(20060529-srinivasan.jpg|200|267|S.R.Srinivasan)%]

நான் போன சமயம், சிலர் கையில் ஒரு பூதக்கண்ணாடி வைத்துக்கொண்டு ஓவியத்தைப் பார்த்து ரசித்துக்கொண்டிருந்தனர்.


மிக எளிமையாக ஒரு மேல்துண்டுடன் வந்தவர்களுக்கு எல்லாம் தான் வரைந்தவற்றை விளக்கிக்கொண்டிருந்தார். சித்திர கவி பற்றி நாம் கேள்விப்பட்டதுண்டு, அதாவது கவிதையை சித்திர வடிவில் எழுதுவது. ஆனால் திரு ஸ்ரீநிவாசன், கவிதையால் சித்திரத்தை வரைந்துள்ளார். ஆம், கோடு, புள்ளி எதுவும் இல்லாமல், நாலாயிர திவ்வியப்பிரபந்ததைக் கொண்டு 108 திவ்விய தேச பெருமாளை அந்தந்த நிலைகளிலேயே வரைந்துள்ளார்.


[%image(20060529-srinivasan_and_others.jpg|200|150|Srinivasan + crowd)%]

உதாரணத்திற்கு ஸ்ரீரங்கம் பெருமாளை 11 ஆழ்வார்கள் மங்களாசாசனம் செய்த 247 பாட்டுக்களால் வரைந்துள்ளார்.


அதுவும் எப்படி, திருப்பாணாழ்வார் பாடிய 'அமலனாதிப்பிரான்' என்ற பாட்டில் வரும் திருவரங்கனின் அழகை அவர் அங்கங்களுக்கு கச்சிதமாக பொருத்தியுள்ளார். ( 'திருக் கமல பாதம்வந்தென்கண்ணி' என்ற வரியை- பாதத்திற்கும், நீள்முடியன்.. என்ற வரி தலைக்கும்; திரு வார மார்பதன்.. - மார்புக்கும் அழகாக பொருத்தியுள்ளார்) பிரபந்தத்தை அனுபவித்தால் தான் இது போல் செய்யமுடியும்.


இதே போல் ராமாநுஜ நூற்றந்தாதியைக் கொண்டு ராமானுஜர், குலசேகர ஆழ்வார் பாடிய 10ஆம் திருமொழியை கொண்டு ராமர் பட்டாபிஷேகம்; விஷ்ணுசகஸ்ரநாமம் கொண்டு விஷ்ணு; மதுரகவியாழ்வார் அருளிச்செய்த கண்ணி நுண்சிறுத்தாம்பைக் கொண்டு நம்மாழ்வார்; திருப்பாவையை கொண்டு ஆண்டாள், 4000 திவ்வியபிரபந்த அடிவரவை கொண்டு ஸ்ரீநிவாச பெருமாள்; என்று எல்லா படங்களும் வியப்பை தருகின்றன.


ஸ்டேட் பாங்கில் வேலை பார்த்துக்கொண்டு, வீட்டில் தனக்கு கிடைக்கும் ஓய்வு நேரத்தில் சுமார் 60 நாட்கள் கஷ்டப்பட்டு இந்த ஓவியங்களை வரைந்துள்ளார். இந்த ஓவியம் அனைத்தும் புத்தகமாக வந்துள்ளது.
ஓவியம் பார்க்க வந்த ஒருவர் "சார் புத்தகம் என்ன விலை?" என்றார்.
"இந்த புத்தகத்துக்கு விலை நிர்ணயம் செய்யவில்லை, ஆனால் ஒரு திவ்விய தேசத்திற்கு ஒரு ரூபாய் கொடுத்தால் கூட போதும்" என்றார் ஸ்ரீநிவாசன் தன்னடக்கத்துடன்.


இந்த செய்தி பற்றி
TheHindu
தினத்தந்தி


[%image(20060529-cucum.jpg|200|150|cucum fruit)%]

* ஸ்ரீரங்கத்தை கடந்து வந்த போது "பாபி" திரைப்படம் ஊர்வசி தியேட்டரில் வெற்றிகரமாக ஓடிக்கொண்டிருக்கிறது என்ற மிகப் பெரிய போஸ்டர். அதற்கு கீழே "நான் ரெடி, நீங்க ரெடியா" என்று ஒரு பெண் சொல்லுவதாக... காவிரி பாலத்திற்கு இந்த பக்கமும் அந்த பக்கமும் எவ்வளவு வித்தியாசம் !


 * திருச்சி வெயிலுக்கு வெள்ளரி பழம் கிடைக்கிறது. அழகாக வாழை மட்டையில் சுற்றி....ஒரு பெரிய பழத்தின் விலை ரூ10. சக்கரை, ஐஸ் கட்டியும் போட்டு சாப்பிட்டால் ... ஆஹா


சில படங்கள்:


[%popup(20060530-4000_1.jpg|224|300|1)%][%popup(20060530-4000_2.jpg|300|224|2)%][%popup(20060530-4000_3.jpg|300|224|3)%][%popup(20060530-4000_4.jpg|300|224|4)%]

திரு S.R.ஸ்ரீநிவாசனின் முகவரி
149, ஸ்ரீரங்க பாதுகா,
கீழச்சித்திர வீதி,
ஸ்ரீரங்கம்,
திருச்சி - 620006
Phone: 0431-2437835
Mobile: 94437 37321
srirangasri1960@yahoo.co.in

Thursday, May 18, 2006

writersujatha.com

சற்று முன் எனக்கு திரு.சுஜாதாவிடமிருந்து வந்த மின்னஞ்சல்.


Dear Desikan,
My website is up and running. the first book is fifty short stories Till now about fifty books have been inputted and are being progressively uploaded Please announce it in your blog Eventually all my books are going to be available thru Paypal on a nominal payment per book.  It may not be fair to give free access to my stories anymore as others will be paying.


Hence I suggest you delink my stories from your website.  We will discuss this when you are in Chennai next
regards
Sujatha


As per the request, I have removed the short stories from my site. :-(

சில்வியா - நேர்காணல் சுஜாதா

ஆனந்த விகடனில் சுஜாதா ஆரம்பித்திற்கும் தொடர். போன முறை பேசிய போது 8-9 வாரம் போகும் என்றார். இதை பற்றி தீபக் எழுதியுள்ளார். ஆரம்பம் என்னும்  கொஞ்சம்  வேகமாக  இருந்திருக்கலாம்  ( "அப்படீன்னா?" என்றார் வசந்த். "அப்படியா?" என்றார் கணேஷ். மற்றும் ரசிக்கும் படி இருந்தது ).


 


அடுத்ததாக நிலாச்சாரலில் சுஜாதா அவர்களின் நேர்காணல். கிட்டத்தட்ட ஒரு டஜன் கேள்விகள். கேள்விகளை விட பதில் சின்னது. பதில் எழுதும் போது, பக்கத்து விட்டு அழும் குழந்தை, மேல் மாடி ஸ்டிரியோ அவரை டிஸ்டர்ப் செய்ததா என்று கேட்க வேண்டும். நேர்கணலுக்கு எடுத்து செல்லும் லிங்க் இங்கே

Thursday, May 4, 2006

எழுபத்தொன்று - சுஜாதா

[%image(20060504-sujatha_hindu_pic.jpg|351|263|Sujatha)%]

அதிகாலையிலிருந்து போன்கால்கள், பொக்கேக்கள், பரிசுகள், ஏதோ நேற்றுப் பிறந்தவன்போல என்னை உணரவைக்கும்  இந்தப் புதிய சங்கதிகளை என்னை விட என் எழுத்துக்கு நண்பர்கள் தரும் மரியாதையாக எண்ணி அதில் மமதை கொள்ளாமல் இருக்க முயற்சிக்கிறேன். பேரெழில் குமரன் ஒரு மிகப் பெரிய வாழ்த்து அட்டையில் என் போட்டோக்களை அமைத்து  லாமினேட் பண்ணி அனுப்பியிருந்தார். குறைந்தபட்சம் அதைத் தயாரிக்க இரண்டு நாளாகியிருக்கும். அவர் என் பரம ரசிகர். மகனுக்கு வசந்த் என்று பெயர் வைத்திருப்பதாகச் சொன்னார்.


எழுபத்தோரு வயதைக் கடந்த இந்த தினத்தில் பி.ஜி.உட்ஹவுசின் over Seventy என்கிற புத்தகம் நினைவுக்கு வருகிறது. அவர் எழுபது வயதைக் கடந்ததும் இந்தப் புத்தகத்தை எழுதினார். தன்னைச் சுற்றிலும் நிகழ்ந்த மாற்றங்களை அவருடைய தனிப்பட்ட நகைச்சுவை உணர்வுடன் எழுதினார். 'என்னப்பா! உனக்கு எழுபது வயதாகிறதாமே! பார்த்தால் 105 வயசான மாதிரி தெரிகிறாய். ஏன் இதைப் பற்றி எழுதி இன்னும் காசு பண்ணவில்லை?' என்று துவங்கி சில அருமையான கட்டுரைகள் எழுதியுள்ளார்.



''அமெரிக்காவில் இப்போதெல்லாம் மக்களுக்கு மரியாதை உணர்வு அதிகமாகிவிட்டது. இப்படித்தான் அன்று ந்யுயார்க்கில் சாலையில் சென்று கொண்டிருந்த ஒருவனை தன் விரோதி என்று எண்ணிக்கொண்டு ஒருவன் முதுகில் கத்தியால் குத்திவிட்டான். தவறை உணர்ந்ததும் 'ஸாரி' சொன்னான். இப்போதெல்லாம் மரியாதை அதிகமாகிவிட்டது''.


'கின்னஸ் ரிக்கார்டு'க்காக தொடர்ந்து நூறு முட்டை சாப்பிட்டவனை பேட்டி கண்டு  எழுதுகிறார்.


''எப்படி இப்படியொரு சாதனை படைக்க வேண்டும் என்கிற உந்து சக்தி உனக்குக் கிடைத்தது?''


'எல்லாவற்றிக்கும் என் அம்மாதான் காரணம். அவளுக்காகத்தான் இதை செய்தேன். மகனே! உலகத்தில் எதாவது சாதிக்க வேண்டும் என்றாள்''


''எல்லாம் சரி. எப்படி நூறு முட்டை சாப்பிட முடிந்தது? என்ன என்ன பயிற்சிகள் செய்தாய்?''


''அது ஒன்றுமில்லை. முதலில் ஒரு முட்டை சாப்பிட்டேன். அதை முழுங்கியதும் இரண்டாம் முட்டையை சாப்பிட்டேன். அதன்பின் முட்டை நம்பர் மூணு.. இப்படி நாற்பத்தைந்தாவது முட்டையில் நிதானித்துக்கொண்டு நாற்¢பத்தாறாவதுக்குச் சென்றேன்.''


''உன்னால் நாட்டுக்கே பெருமையப்பா'' என்று கட்டுரையை முடிப்பார்.


உட்ஹவுஸ் போல் எனக்கு எழுத வராது. எழுபது வயதைக் கடந்ததைப் பற்றி நான் எழுத வேண்டுமென்றால் கவனிக்கும் விஷயங்கள் இவை. மெரினாவில் பலர் என்னை 'உடம்பு பரவாயில்லையா?' என்று விசாரிக்கிறார்கள். 'அதான் குண்டுக் கல் போல முன்னாலேயே நிற்கிறேனே' என்று பதில் சொல்வதற்கு பதிலாக மையமாக தலையாட்டுவேன். பலர், 'இப்ப நீங்க எழுதற 'கண்டதும் கேட்டதும் கல்கில விடாம படிக்கிறேன்' என்பார்கள். சிலர், 'இப்ப எதுல எழுதறிங்க?' என்கிறார்கள். சிலர் மிக அருகே வந்து தொட்டுப்பார்த்து , 'சார்! உங்களை எங்கயோ பாத்த மாதிரி இருக்கே. சட்டுனு நினைவு வரலை. நீங்க யாரு?' என்கிறார்கள். ஒருவர் என்னை கோபத்துடன் அணுகி, 'ஏன் சார், இவ்வளவு வயசான மாதிரி தெரியறீங்க?' என்றார்.


''வயசு எழுபத்து ஒண்ணு ஆய்டுத்து சார் எனக்கு.''


''இருந்தாலும் இன்னும் நீங்க சின்னவர்னு ஏன் நினைச்சேன்?''


எனக்கு வயசாவதனால் கோபம் கொள்ளும், கோபம் கொண்ட அனைவருக்கும் நன்றி.


- சுஜாதா


பிகு: நேற்று சுஜாதாவிற்கு பிறந்த நாள் வாழ்த்து சொன்ன போது இந்த கட்டுரையை எழுதியிருக்கேன் என்றார். "சார், எனக்கு அனுப்பு வைத்தால் என் வலைப்பதிவில் போட்டு பேர் வாங்கிக்கொள்வேன்" என்றேன். சரி என்று அனுப்பிவைத்தார் அவருக்கு என் நன்றி.


போன வருடத்திய கட்டுரை:


ஹாப்பி பர்த்டே சுஜாதா !
ஹாப்பி பர்த்டே சுஜாதா ! - Follow-up