Friday, January 20, 2006

Book(not)fair

[%image(20060120-desikan_at_bookfair.jpg|328|246|At the BookFair)%]

புத்தகக் கண்காட்சிக்கு இரண்டு முறை போனேன். அங்கு வாங்கிய புத்தகங்களள  பற்றிச் சொல்ல போவதில்லை பயப்படாதீர்கள்.


* புத்தகக் கண்காட்சி பின்வாயிலில் ஓர் இளைஞர் நம்முடைய பெயரை அரிசி, கடுகு போன்றவற்றில் எழுதி (ரூ 20/= ) ஒரு சாவிக் கொத்தில் போட்டுத் தருகிறார். இந்த முறை இது புதுசு. அதைக் கடந்து வந்தால் டெல்லி அப்பளம், சூப், ஆவின் கடை, மிளகாய் பஜ்ஜி என்று சுவாரசியமாக இருக்கிறது. முதல்முறை போனபோது இருந்த அருமையான விவேகானந்தா காப்பி (விலை 6/-)  இரண்டாவது முறை போன போது இல்லை.


* உள்ளே வந்தால் எது நல்ல புத்தகம் (அல்லது எனக்குப் பிடித்த புத்தகம் எது) என்று கண்டுபிடிப்பது கொஞ்சம் கடினம். இந்த முறை ஒன்று கண்டுபிடித்தேன், புத்தகம் 100 பக்கம் என்றால் அதனுடைய விலை ரூ 50/-; 200 பக்கம் என்றால் ரூ100/=. கெட்டியட்டை என்றால் ஒரு ரூ20/= சேர்த்துக் கொள்ளுங்கள்.


* நக்கீரன் பத்திரிகையில் பெரும் சர்ச்சையைக் கிளப்பிய, 'இந்து மதம் எங்கே போகிறது?' அக்னி ஹோத்ரம் ராமானுஜ தாத்தாச்சாரியார் எழுதியது புத்தக வடிவில் நன்றாகப் போகிறது. "சார், எனக்கு ஒரு இந்து மதம்(?)" என்று பலரும் விரும்பி வாங்குவது நம்பிக்கையைத் தருகிறது. அர்த்தமுள்ள இந்து மதம், அப்துல் கலாம், காந்திஜியின் ("அந்த முப்பது ரூபாய் புத்தகம் ஒன்னு கொடுப்பா!") சத்திய சோதனை நன்றாகப் போகிறது.


* ஒரு கடையில் ஆன்மிகம் என்ற பிரிவில் மஞ்சள் அட்டை போட்ட பெரிய கீதையும், தி.க வெளியீடான கீதையின் மறுபக்கமும் இருந்தது. இந்த முறை, கடைகளைத் தேர்வு செய்ததில் விதி விளையாடியிருக்கிறது என்று நினைக்கிறேன். ரமணர், BVB ஸ்டால் பக்கத்தில் தி.க ஸ்டால்; ஒஷோ ஸ்டால் பக்கத்தில் R.K.Mutt ஸ்டால். Marxist ஸ்டால் பக்கத்தில் Venture Capitalist.


* பெரும்பாலும் கூட்டம் ஆங்கிலப் புத்தகக் கடைகளில்தான் பார்த்தேன். நேஷனல் புக் டிரஸ்ட் கடையில் ஒரு தமிழ் கதைப் புத்தகத்தை ஒரு அம்மா வாங்கியவுடன் உடன் வந்திருந்த சின்ன பையன் "Mummy, do you want me to read this book?" என்று சந்தேகத்துடன் கேட்டது. பில் போடுபவர் பில் போடலாமா வேண்டாமா என்று ஒரு நிமிடம் குழம்பினார்.


* உங்கள் புத்தகங்களை யாரும் போட முன்வரவில்லை என்றால் நீங்களே ஒரு பதிப்பகத்தை ஆரம்பிக்கலாம். பல புத்தகங்கள் அப்படித்தான் வந்திருக்கிறது. வலைப்பதிவு ஆரம்பிப்பதைப் போல் :-)


* விகடன், குமுதம் ஸ்டாலில் நல்ல கூட்டம். புத்தகங்கள் விலையும் கொஞ்சம் கூடுதலாக இருக்கிறது. ஆனால் வாங்குகிறார்கள். leonardo da vinci ஓவியங்கள் அடங்கிய புத்தகம் ஒன்று என்னை மிகவும் கவர்ந்தது. ஒரு நாளிதழ் சைஸுக்கு, கிட்டத்தட்ட 1000 பக்கங்கள். விலை 9800/= (ஆட்டோ செலவு 100ரூபாய் ஆகும்). அதேபோல் ஓலைச்சுவடி போல் திருக்குறள் புத்தகத்தை நர்மதா பதிப்பகம் வெளியிட்டிருக்கிறார்கள். வித்தியாசமாக இருந்தது.


* சமையல் குறிப்பு, ஆன்மிகம், பணம் பண்ண என்ன வழி, கோபப்படாமல் இருப்பது எப்படி, இருபத்தி நான்கு மணிநேரத்தை இருபத்தி ஐந்து மணி நேரமாக ஆக்குவது எப்படி, நீங்களும் ஒரு அறிவாளி/விஞ்ஞானி, வெற்றி பெற 100 வழிகள், 1008 பழமொழிகள்/விடுகதைகள், தென்னலி ராமன், முல்லா கதைகள் போன்ற புத்தகங்களை ஒதுக்கினால் மீதி உள்ள புத்தகங்களை தென்னிந்திய புத்தகப் பதிப்பாளர்கள் மற்றும் விற்பனையாளர்கள் கூட்டமைப்பு (BAPASI) ஸ்டாலில் (அல்லது அலுவலகத்தில்) அடக்கிவிடலாம்.


* பல தமிழ் புத்தகங்கள் ஆங்கில புத்தகத்திலிருந்து சுட்டது அல்லது தழுவி எழுதப்பட்டது என்று அதன் தலைப்பையும், உள்ளே இருக்கும் சரக்கையும் பார்த்தாலே தெரிகிறது. இல்லாவிட்டால் இது போல் தலையணை சைஸ் புத்தங்களை எழுத முடியாது. அடுத்த முறையாவது நல்ல தமிழ் புத்தகங்கள் வந்தால் நன்றாக இருக்கும். பார்க்கலாம். காலச்சுவடில் ஓரளவு நல்ல புத்தகங்கள் இருக்கிறது. பல ஸ்டால்களில் புத்தகத்தின் அட்டை மட்டுமே நன்றாக இருக்கிறது.


[ படம் உதவி ஹரன் பிரசன்னா - நன்றி ]

Thursday, January 19, 2006

உதவி தேவை !!

சுஜாதா அவர்கள் சென்னை ( கிண்டி) MIT கல்லூரி வெள்ளி விழா மலரில் எழுதிய கட்டுரையை தேடிக்கொண்டிருக்கிறேன்.  ஆங்கில கட்டுரை என்று நினைக்கிறேன். அந்த கட்டுரையின் பிரதியை  யாராவது  வைத்திருந்ததல் எனக்கு அனுப்புங்கள்.  மகிழ்ச்சியடைவேன்.


சில MIT நண்பர்களிடம் சொல்லியிருக்கிறேன். பார்க்கலாம்.


அன்புடன்,
தேசிகன்

Thursday, January 12, 2006

விடுபட்டுபோன வி.சி - தம்பி

நண்பர் அதியமான் சில வாரங்களுக்கு முன் அம்பலம் அரட்டையில் முன்பு எப்போதோ படித்த ஒரு விஞ்ஞான சிறுகதையை உயிர்மை வி.சி தொகுப்பில் காணவில்லை என்றார். எனக்கு கொஞ்சம் ஆச்சரியமாக இருந்தது. அந்த கதையின் அவுட்லைனையும் சொன்னார். பிறகு சுஜாதாவிடம் பேசிக்கொண்டிருந்த போது அது முன்பு கணையாழியில் எழுதியது என்று நினைக்கிறேன் என்றார்.


அடுத்தவாரம் அதிர்ஷ்டம் என் பக்கம் அடித்தது. 1977 ஆகஸ்ட் மாதம் கணையாழியில் அந்த கதை கண்டுபிடித்தேன். கதையின் பெயர் தம்பி.


படிக்க விரும்புபவர்கள் இங்கு கிளிக் செய்யவும்.


அடுத்த உயிர்மை வி.சி பதிப்பில் இந்த கதை இடம்பெறும். நண்பர் அதியமானுக்கு என் நன்றி.


[ Update 21st Jan 2006] நண்பர் ஸ்ரீகாந்த் 'தம்பி'யின் ரிஷிமூலத்தை ஆராய்ந்து ஒரு பதிவு போட்டிருக்கிறார். அது இங்கே

Tuesday, January 10, 2006

வைகுண்ட ஏகாதசி

இன்று வைகுண்ட ஏகாதசி.
ஸ்ரீரங்கம் போக முடியாதவர்கள் இங்கே செல்லவும்.


படம் 1, படம் 2

Monday, January 9, 2006

சீரியஸான காமெடி

சனிக்கிழமை உயிர்மையின் இரண்டாவது கூட்டம், இரண்டு கூட்டமாக நடந்தது. எனக்கு இந்தக் கூட்டங்களில் அவ்வளவாக ஆர்வம் கிடையாது. இவர்கள் உலகம் வேறு; என் உலகம் வேறு. இந்தக் கூட்டத்திற்கு போனதற்கு இரண்டு காரணங்கள்- ஒன்று, நண்பர் மனுஷ்யபுத்திரனின் அழைப்பு; மற்றொன்று நான் பெரும் மதிப்பு வைத்திருக்கும் இந்திய கம்யூனிஸ்ட் கட்சியின் மூத்த தலைவர திரு.நல்லக்கண்ணு அவர்களுடைய பேச்சைக் கேட்க.


கூட்டம் நான் போனபோது ஆரம்பித்திருந்தது. எழுத்தாளர்களின் புத்தகங்களை நல்லக்கண்ணு வெளியிட, அதைப் பற்றி மதிப்புரை என்று கூட்டம் போய்க்கொண்டிருந்தது. எஸ்.ராமகிருஷ்ணனின் புத்தகத்தை பி.ஏ.கிருஷ்ணன் பாராட்டியும் சில இடங்களில் உள்ள மொழிபெயர்ப்புக் குறைகளையும் மிக அழகாகச் சுட்டிக்காட்டி தன் பேச்சை முடித்துக்கொண்டார். அப்போது பின்வரிசையில் உள்ள பெண்கள்(பத்து நிமிடம் முன்பு வந்தவர்கள்) திடீர் என்று எஸ்.ராமகிருஷ்ணன் தங்களுக்கு விளக்கம் அளிக்குமாறு சத்தம் போட்டனர். ( கூச்சல் போட்டார்கள் என்பதுதான் சரியான வார்த்தைப் பிரயோகமாக இருக்கும் ).


'சண்டக் கோழி' என்ற படத்தில் 'குட்டிரேவதி' என்று பெயர் வைத்து வசனம் எழுதியதைக் கண்டிக்கிறோம் என்றார்கள். துப்பட்டாவைத் தூக்கிக் காண்பித்து ஏதேதோ பேசினார்கள். அப்போது எஸ்.ராமகிருஷ்ணன் மைக்கை பிடித்து, அந்தப் படத்தில் அந்தக் குறிப்பிட்ட வசனம், தான் எழுதியதில்லை என்று சொல்லி அதற்கு, தான் பொறுப்பேற்க முடியாது என்றார். "நீங்கள் வேண்டுமென்றால் படத்தில் தயாரிப்பாளர் மற்றும் இயக்குனரிடம் உங்கள் கண்டனத்தைச் சொல்லுங்கள்" என்றார். அதை வந்திருந்த பெண் கவிஞர்கள் எற்றுக்கொள்ள மறுத்தார்கள். சிலர் இந்தக் கூட்டத்தைத் தயவுசெய்து நடத்த விடுங்கள் என்று கேட்டது 'செவிடன் காதில் சங்கு' என்ற பழமொழியை நினைவுப்படுத்தியது.


அப்போது மேடை ஏறிய ஒருவர் (பெயர் ரமேஷ் என்று பிறகு தெரிந்துகொண்டேன், அவர் புத்தகமும் நேற்று வெளியிடப்பட்டது), 'மாலதி மைத்திரியை’ப் பற்றி எழுதியிருந்தால் நான்கு தலைகள் உருண்டிருக்கும் என்று பேசினார். பின்னர் கவிஞர் மனுஷ்யபுத்திரன் கேட்டுக்கொண்டதற்குப் பின்னர் வெளியே சென்றார்கள். புக்பாயிண்ட் வெளியே போய் நின்று ஸ்பீச் கொடுத்துக்கொண்டிருந்தார்கள். அவர்களை வேடிக்கை பார்க்க கூட்டம் சேர்ந்தது.


வெளியே ஒரு காமெடிக் கூட்டம்; உள்ளே இரு சீரியஸ் கூட்டம் என்று வந்திருந்தவர்கள் எதைக் கேட்பது என்று கொஞ்சம் குழம்பினார்கள். பெண் கவிஞர்கள் வெளியே பேசிமுடித்துவிட்டு கூட்டத்தைப் பார்த்து, "எங்களுக்கு இப்போது ஆதரவு அளித்தது போல் அடுத்தகட்டப் போராட்டத்திற்கும் ஆதரவு அளிக்க வேண்டும்!" என்று சொன்னவுடன் எல்லோரும் நழுவினார்கள்.


எனக்கு ஒரே வருத்தம் இதுதான் - இவ்வளவு எழுதி, படித்த இவர்களுக்கு ஒரு stage etiquette தெரியவில்லை. 80 வயது நிரம்பிய நல்லக்கண்ணு என்ற ஒரு சிறந்த மனிதருக்குமுன் இவ்வளவு கூத்தும் நடைபெற்றது. அரசியலை விட மிக மோசமான சாக்கடை என்று இவர்கள் நிருபித்துக்காட்டினார்கள்.


தமிழ் முரசு - செய்திகள்/படங்கள் :   1, 2, 3, 4, 5, 6, 7


[இந்த நிகழ்ச்சியைப் பற்றிய செய்தி, புகைபடங்கள் - நன்றி தமிழ்முரசு. ஒரு மாறுதலுக்கு செய்தியைத் திரிக்காமல் அப்படியே போட்ட தமிழ்முரசுக்கு ஒரு சபாஷ்!! ]


இதை பற்றி மாலன் பதிவு: எஸ்.ராவிற்கு ஏற்பட்ட தர்மசங்கடம்
அந்திமழையில் வந்த செய்தி
(ரஜினி) ராம்கி குசும்பு
உருப்படாதது நாராயணன் பதிவு  

Sunday, January 8, 2006

சுஜாதாவின் நூல்கள் வெளியீட்டு விழா

வெள்ளிக்கிழமை மாலை சுஜாதாவின் புத்தக வெளியீட்டு விழாவிற்கு சென்றிருந்தேன். அதை பற்றி நான் எழுதுவதை விட மற்றவர்கள் எழுதுவதே சிறப்பு. அந்த விழாவை பற்றி  ஆசாத் அருமையாக எழுதியிருக்கார். அதை இங்கு படிக்கலாம்


தினமலரில் அதை பற்றிய சிறு குறிப்பை இங்கு காணலாம்.


தினமலர் செய்தி
[%popup(20060108-07_01_2006_006_005_001.jpg|779|492|தினமலர் புகைப்படம்)%]


நான் அந்த விழாவில் வைரமுத்து வெளியிட 'சிலப்பதிகாரம் ஓர் எளிய அறிமுகம்' என்ற புத்தகத்தை பெற்றுக்கொண்டேன். அதை பற்றி வைரமுத்து பேசினார். (நான் பேசவில்லை பயப்படாதீர்கள் )


 [%popup(20060108-desikan_small.jpg|400|300|என்னுடைய படம்)%]


அடுத்த நாள் விழாவில் சீரியஸான காமெடிகள் பல நடைபெற்றன. எழுதிக்கொண்டிருக்கிறேன். சீக்கிரம் பதிவில் போடுகிறேன்.  காத்திருங்கள்.


[ Update 1: 9th Jan 2005, 10:45am ] இந்த நிகழ்ச்சி பற்றி அந்திமழையில் வந்திருக்கும் குற்ப்பு.


[ எனக்கு என் புகைப்படத்தை அனுப்பி வைத்த என் நண்பர் சாமிநாதன் மற்றும்  புகைப்படத்தை எடுத்த உப்பிலிக்கு நன்றி ]

Thursday, January 5, 2006

இரண்டு விழாக்கள் இருபது புத்தகங்கள்

உயிர்மை பதிப்பகம் 2006ஆம் ஆண்டு சென்னை புத்தகக் கண்காட்சியை ஒட்டி இரண்டு பெரும் புத்தக வெளியீட்டு விழாக்களை ஜனவரி 6-7 தேதிகளில் அடுத்தடுத்த தினங்களில் நடத்தவிருக்கிறது.


ஜனவரி 6 அன்று மாலை சென்னை தென்னிந்திய திரைப்பட வர்த்தக சபை அரங்கில்  மாலை ஆறு மணிக்கு சுஜாதாவின் பத்துப் புத்தகங்கள் ஒரே மேடையில் வெளிடப்படுகின்றன.
1.சிலப்பதிகாரம் ஓர் எளிய அறிமுகம், 2.திரைக்கதை பயிற்சிப் புத்தகம்,
3.சுஜாதாவின் நாடகங்கள்(முழுத் தொகுப்பு),
4.சுஜாதாவின் மர்மக் கதைகள் (முழுத் தொகுப்பு),
5.சுஜாதா பதில்கள்(இரண்டாம் பாகம்),

6.புதிய நீதிக் கதைகள் ஆகிய புதிய நூல்களுடன் 
7.ரத்தம் ஒரே நிறம்,
8.வஸந்த் வஸந்த்,
9.வண்ணத்துப் பூச்சி வேட்டை,
10.திருக்குறள் புதிய உரை

ஆகிய நூல்கள் மறுபதிப்பாகவும் வெளிவருகின்றன.


இவ் விழாவில் வைரமுத்து, இயக்குனர் ஷங்கர், ரா.கி.ரங்கராஜன், ஜெயமோகன், மதன், கு.ஞான சம்பந்தன், வாஸந்தி, திலகவதி, சுதாங்கன், பூர்ணம் விஸ்வநாதன் ஆகியோர் நூல்கள் குறித்து சிறப்புரையாற்றுகின்றனர்


ஜனவரி 7ஆம் தேதி மாலை சென்னை புக் பாயிண்ட் அரங்கில் 10 நவீன எழுத்தாளர்களின் பத்து நூல்களை உயிர்மை பதிப்பகம் வெளியிடுகிறது.


1.எஸ்.ராமகிருஷ்ணனின் 'விழித்திருப்பவனின் இரவு',
2.ஜெயமோகனின் 'ஆழ்நதியைத் தேடி',
3.ஜீ. முருகனின் 'சாம்பல் நிற தேவதை',
4.கி.ராஜநாராயணனும் கழனியூரனும் தொகுத்த 'மறைவாய் சொன்ன கதைகள்' (நாட்டுப் புற பாலியல் கதைகளின் தொகுப்பு),
5.மணாவின் 'தமிழகத் தடங்கள்',
6.மு. சுயம்புலிங்கத்தின்' நிறம் அழிந்த வண்ணத்துப் பூச்சிகள்',
7.எம்.யுவனின் 'கை மறதியாய் வைத்த நாள்',
8.'கு.அழகிரிசாமி கடிதங்கள்' (கி.ராவுக்கு எழுதியது),
9.பிரேம் ரமேஷின் 'உப்பு',
10.அ.ராமசாமியின் 'பிம்பங்கள் அடையாளங்கள்'


ஆகிய நூல்கள் வெளியிடப்படுகின்றன.


நூல்களை பி.ஏ.கிருஷ்ணன், யுவன் சந்திர சேகர், நாஞ்சில் நாடன், பிரேம், ஆர்.நல்லக்கண்ணு, சுகுமாரன், பாவண்ணன், பிரபஞ்சன், ஞானக்கூத்தன், எஸ்.விஸ்வநாதன் ஆகியோர் நூல்களை வெளியிட்டு உரையாற்றுகின்றனர். விழா குறித்த மேலதிக தகவல்களுக்கு கீழ்க்கண்ட தொலைபேசி எண்களில் அழைக்கலாம். 044-24993448.


இவ்விழாவில் வெளியிடப்படும் நூல் போக சென்னை புத்தகக் கண்காட்சியை முன்னிட்டு எஸ். ராமகிருஷ்ணனின் புதிய நாவலான 'உறுபசி', ஜெயமோகன் எழுதிய பேய்க்கதைகள் தொகுப்பான 'நிழல்வெளிக் கதைகள்' லதா ராமகிருஷ்ணன் மொழிபெயர்த்த 'அன்னா அக்மதோவா கவிதைகள்' உள்ளிட்ட பல நூல்களை உயிர்மை பதிப்பகம் வெளியிடுகிறது.


அழைப்பிதழ்கள் 


[%popup(20060105-invl1.jpg|564|400|அழைப்பிதழ்(1))%] , [%popup(20060105-invl2.jpg|564|400|அழைப்பிதழ்(2))%] , [%popup(20060105-invl3.jpg|564|400|அழைப்பிதழ்(3))%]